Kandetu a tameke omakonakono kombinga yepandelo lya RDP

OKAMPANI ontumimawimombepo ya Namibia Broadcasting Corporation (NBC) oya tseyitha kutya opwa ningwa epuko sho epandela lyopaati yo Rally for Democracy and Progress (RDP) li holoke konima yOmupresidende Hifikepunye Pohamba, pethimbo a li ta gandja oshipopiwa she shomumvo omupe kOtelevisi momasiku 31 ga Desemba 2008.

Omukuluntuwiliki gwa NBC Bob Kandetu okwa ti ye okwa mona olopota yoshizemo shomakonakono kombinga yoshinima shika ya tulwa kumwe ku Menindjela gwOonkunana nIiningwanima yopethimbo mu NBC, Menesia Muinjo, Omukuluntu gwIikwatelevisi Claudia Iikela na Menindjela gwa kwalukhe miikwautekenika, Ruben Prinz.
‘Olopta oye shi koleke kutya opwa longwa nuuhaha nokwaatalanawa pokati keteleko, elopoto netulomombepo lyoshipopiwa,’ Kandetu osho a lombwele The Namibian ngaaka.
Okwa uvaneke kutya ota ka ithana oshigongi shEwiliko lya NBC oshiwike shika, ya ka kundathene kutya onkatu yi li ngiini yi na okukatukwa moshinima shika. Kandetu okwa li a indile Oomendjela ayehe mu kwalukehe mu NBC, ya ze mo momafudho opo ye ninge omakonakono mu shika.
Epandela lya RDP olya li aniwa lya holoka konima ya Pohamba uule wosekonde manga oshipopiwa she sha li shu uka pehulilo. Opaati tayi pangelo yo Swapo oya gandja uusama ku Kandetu sho NBC a ningi ngakaa, tayi ti kutya Kandetu oku li oshilyo sha RDP na shika osho nee sha eta NBC a ninge ngaaka.
Omasiku ga zi ko, Amushanga gwOmauyelele mo Swapo Jerry Ekandjo, okwa ti oshinima shika osha li sha halutha noonkondo ewiliko alihe lyo Swapo na osha ningwa nelalakano okunyateka edhina lyOmupresidende.
Ekandjo okwa ti Kandetu okwa kala noku shi ulika a manguluka ong’omuyeluthi gwonyeka ya RDP na oku li wo oshilyo sho RDP sha tseyika nawa.
Nande ongaaka, Kandetu okwa popi kutya ye ke na ekwatathano na RDP. Ta ti, ye okwa li ashike a yambidhidha Hidipo Hamutenya, pethimbo ya li taya kondjele oshipundi shUupresidende wo Swapo, okuya momahogololo gOpaupresidende gomomumvo 2004.
Yaali mboka ya li mondambo na Hamutenya oya li Pohamba ye mwene nOmuprimaminista Nahas sngula. Kandetu okwe ye oku li oshilyo sho Swapo.
Kandetu ye mwene okwa li ngaa a gandja ombili koshigwana moshinima shika na okwa li wo a popi kutya oshinima shika oshinene na oshi na okukonakonwa, ku talika kutya epuko olya zi peni opo ku katukwe onkatu.
Nande ongaaka, Ekandjo okwa ti egandjombili lya Kandetu kali na shoka tali ka kwathele molwashoka, edhina lyopaati yawo olya netekwa nale. Okwa ti Kandetu okwa ningi omathimbo ta ningi iinima ya puka miilonga ye mu NBC, mwa kwatelwa okukala aniwa a gama kiinima yi na sha na RDP, opo a gwanitha po omauwanawa gopaati ndjika.
Oshi li sha yela kutya Swapo okwa hala Kandetu a tithwe, pamwe nomuniilonga gumwe omukuluntu mOradio ya NBC, Lapaka Ueyulu (ngoka e li oshilyo shOngundumutima ya RDP) nosho wo Menindjela gwOshikondo shOoliisinsa dho Televisi, Cecil Nguvauva. Nguvauva oha popi wo aniwa nokuli piigongo ya RDP.