Kamwi a patulula iitopolwa yimwe mOshipangelo sha Shakati

OMINISTA yUuhaku nIilonga yOnkalonawa Omundohotola Richard Kamwi omasiku ga zi ko okwa tula miilonga Iitopolwa yimwe ya opalekululwa mOshipangelo shEpangelo sha Shakati.

Iitopolwa mbyoka ya opalekululwa mOshipangelo moka ongashi nee shoka shokuthikila aanuuvu nenge oonakupangwa, shoka sho CDC noshowo shOonzo dhOmauyelele, mOndjugo yOmambo moka mwa tulwa omashina omape gOokoompiuta.Minista Kamwi ta ti, Ooprojeka ndhika dhimwe dhomOoprojeka odhindji dha dhilaadhilwa dhi longwe mOshipangelo shika shEpangelo sha Shakati muule wethimbo twa thinda mo. Omundohotola Kamwi ta pandula noonkondo Omahangano Omaniimaliwa ngashi Ombaanga ya Standard, NAMDEB noshowo USAID ngoka ga tokola toko okukwathela Uuministeli we metungululo nomewapalekululo lyIitopolwa yimwe mIipangelo ye unene tuu mwaashoka shEpangelo sha Shakati nosha Venduka. Kamwi ta tseyitha wo kutya mOshipangelo shEpangelo sha Venduka omwa tungwa wo ehala ewanawa lyokuthikameka iihauto yaaniilonga yomOshipangelo shoka, Oondhotola, Ooneesa nosho tuu aaniilonga yalwe mOshipangelo moka.Oshimaliwa nee ashihe kumwe sha longithwa mewapalekululo lyIitopolwa mbyoka mOshipangelo shEpangelo sha Shakati oyi thike pOodola dha Namibia Omiliona yimwe oshinkwanu ntano (N$1,5million).’ Onda hala ndi mu lombwele kutya uule wethimbo ndyoka nda kala Ominista yUuministeli mbuka wUuhaku nIilonga yOnkalonawa, onda kala nokukondja opo ndi mone oshimaliwa shokuwapalekulula Iitopolwa mIipangelo yandje. Nda ya koontu dhOmahangano gIimaliwa, ngashi Oombaanga, NAMDEB, Omahangano Omakwashilipaleki, USAID nosho tuu, opo ga kwathele ndje ndi vule okutunga nokuwapalekulula iitopolwa yontumba noyongandi mIipangelo yandje moka, nonda hala ndi mu lombwele nena kutya shi nda thikama komeho geni ngeyi ondi li Ominista yUuhaku nda pandula nondi uvite uuntsa, sho nda kondja nonda mona omakwatho kookuume mboka nda tumbula metetekelo, ndele tandi vulu okutungululitha nokuwapalekitha iitopolwa yimwe mIipangelo yandje ngashi unene mOshakati, ‘ Minista Kamwi ta ti ngawo nokugwedha po ta ti mOshipangelo shEpangelo sha Shakati otamu tungwa Oshitopolwa oshinene shomayakulitho gi ili nogi ili. Ta ti osho tashi ka kala shotango sholudhi ndoka mu Africa, omanga Omukunda gwotango, ano Osala yotango ndjoka yi li metifa lyokutungwa yi li pokupwa notayi ka kala yimwe yomOosala dhatya shoo, mIipangelo moNamibia.Minista Kamwi, ta pandula wo Omuwiliki gwUuhaku mOshitopolwa sha Shana Omundohotola Naftali Hamata, Omukuluntu gwOshipangelo shEpangelo sha Shakati Omundohotola Shannon Kakungulu noshowo Aawiliki yIikondo yi ili noyi ili mOshipangelo shoka noku ya indila ya dhiginine nawa Iitopolwa yawo mbyoka.Molwashoka nee mOshipangelo moka, omwa tulwa nee Ookoompiuta dhokugandja omauyelele gi ili nogi ili, Omundohotola Kamwi okwa indila kOondohotola, kOoneesa, ano kAapangi nokaaniilonga aakuluntu ya longithe ompito ndjoka yokwiimonena omauyelele okupitila mOokoompiuta moka.Minista Kamwi ta indile kaayakuli mIipangelo, ya kale taya longo nuudhiginini nokuyakula oshigwana nawa, meendelelo nopethimbo. Ta ti omathimbo ga zi ko, aakwashigwana oya kala taya nyenyeta komayakulo, itaga ende nawa mIipangelo yi ili noyi ili. Ya kala taya nyenyeta okupitila mIikundaneki moka, ngashii unene muSMS mboka hau kala mOshifo sho The Namibian, yo yamwe taya nyenyeta momawi ga manguluka moka nosho tuu.’ Oshigwana nashi yakulwe nawa mIipangelo yetu moka, ngele hasho nena owa tegelela oshigwana shi tsikile nokunyenyeta,’ Minista Kamwi ta ti ngawo. Oshituthi shika sha li sha wilikwa kOmundohotola Kakungulu, ngoka a gandjele wo Oonzapo dhEpandulo kAawiliki yamwe yUuhaku, mwa kwatelwa na Minista Kamwi ye mwene, osha li wo sha kalwa ku Gavena yaShana, omusamane Klemens Kashuupulwa, Kaansela gwOshikandjohogololo sha Shakatiuzilo tate Loth Kuushomwa, Omunambelewa Omugandjimayele mUutekenika gwa USAID moNamibia Omundohotola Mbayi Kangudie, Omukuluntu gwOmbaanga ya Standard mOshitopolwa Matti Kanalelo noshowo aawiliki yalwe yUuhaku nOmahangano galwe haga kwathele Uuministerli wUuhaku meyakulo lyawo lyoshigwana. Minista Kamwi ta indile kOmahangano galwe ga landule oshiholelwa oshiwanawa shOmahangano ngoka ga tokola nale okukwathela Uuministeli we wUuhaku.