Ovakalimo vamwe vomoshikandjohoololo shaKhorixas ohava fininikwa va twale omidimba dovakwapata vavo kokila ei i li popepi tava ende oule weekilometa 118.
Oshinima eshi osha fiya ovakwashiwana vokoAnigab, Bergsig noFransfontein ve li mehandu nosho yo moupyakadi wakula wopaundjolowele woshiwana.
Oshikumungu eshi osha limbililika ovakalimo nosho yo omalelo eedoolopa, tava ti opapumbwa okuningwa sha meendelelo.
Kamusela wokoshikandjohoololo shaKhorixas Sebastian Gobs okwa hokolola omikundu dovakalimo pefimbo kwa li e li meenghundafana noThe Namibian.
“Moshitopolwa kamu na eekila ndee oitopolwa i hadi ngaashi ei, okukala muhe na eekila otashi ti ohashi fininike eefamili di umbate omidimba doovene.”
Gobs okwa popya oudjuu ou oshiwana shi li muwo, unene ngaa ngee tashi ungaunga noonakufya.
“Keshe efimbo ngee mu na eefya moshitopolwa, eefamili fimbo limwe ohadi lombwelwa di ye kopolifi. Ngee opolifi kai na osheendifo, ovakwapata nava ete omudimba kokila yokoKhorixas voovene ndee osho otashi ti ove na okushinga eekilometa di li 118,” Gobs osho a ti ngaho.
Oshikumungu eshi osha ya fiyo okoupangelo vokoFransfonteint, Anigab noBergsig.
Nande oupangelo ava ova longwa nawa, kave na eenhele dokutula oonakufya, osho a ti ngaho.
“Eenhele adishe edi odi na eefikola, omandiki ounamapya nounaimuna nosho yo omihandjo. Ngee pu na eefya, osha yela kutya shaashi kapu na okila omukundu ou owa wila komapepe oshiwana shi u kandule po.”
Eshi moAnigab muhe na oshitaashi shopolifi nasho osha wedela vali oupyakadi ou.
“Kombinga yomafyo, ngee opolifi kai na osheendifo i dule okuvatela, ovakwapata ove na okuninga omalongekido voovene,” Gobs osho a ti ngaho.
Okwa ti kutya okwa kala nokuninga omaindilo opo oshitopolwa shi yambulwe po, ashike omaindilo aye inaa udika.
“Okwa li nda ninga eindilo kuminista opo ngeno keshe pokapangelo pa tulwe onhele yokutula omidimba manga osheendifo tashi longekidwa,” Gobs osho a ti ngaho.
Okwa ti vali eenhele dimwe moshikandjohoololo oda pumbwa oupangelo vape ashike nande oshiwana osha kala nokuninga omaindilo opamwe novaleli vopamufyuululwakalo, kapu na nande enyamukulo la dja koministili youndjolowele nomayakulo opanghalafano fiyo onena.
Omupopiliko wongudu yoUnited Democratic Front Mabasen Narib okwa pula epangelo opo li yandje oshimaliwa shi vatele mokutunga eekila poupangelo moshitopolwahoololo shaKunene.
“Paife ngaha oKhorixas ashike i na okila moshikandjohoololo shaKhorixas ashishe. Eenhele dopomudingonoko ngaashi Bergsig, Terrace Bay noFransfontein kadi na eekila poupangelo vado.”
Okwa ti ngee omunhu a xulifile meumbo, omudimba ou na okwiilwa po kopolifi ashike luhapu ohapa kala pu na omaimbo molwomumbwe yoyeendifo.
Narib okwa ti oshinima eshi ohashi tula ovakwapata monghalo idjuu yokutwala omudimba wavo koKhorixas voovene omanga ve li moluhodi..
“Oshinima eshi oshi na ondilo neenghono notashi ehameke.”
Okwa ti vali opu na yoo omumbwe yeeambulasha.
“Ovanaudu ovo va pumbwa evatelo lopaunamiti la endelela ohava kala va teelela otuwa i dje koKhorixas.”
Okwa pula opo ku katukwe onghatu meendelelo.
Omupopiliko woministili youndjolowele nomayakulo opangahalafano Walters Kamaya okwa koleka oshinima eshi shomumbwe yeekila koshitopolwa oko.
Okwa ti okila oyo i li koshipangelo shakula shepangelo koKhorixas ohai dulu ashike okukala omidimba di li 12.
“Pamhito ei, ovakwashiwana otava pulwa va tameke okulongifa eekila dokoupangelo ngaashi Erwee, Kamanjab nosho yo okila yokoshipangelo shokOutjo, ngee pu na omumbwe yomeendelelo.”
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
