Kalenga aniwa a kuthwa evi kElelo lya Kahao inaa futwa

OMUKALIMO gwomOkahao mOngandjera mOshitopolwa sha Musati te Abed Kalenga, okwa geela noonkondo Elelo lyoshilando shaKahao, ta ti ota li mu kutha epya lye lyoohekta omulongonambali (12) negumbo lye lyomiti mu na oongulu oonene, shaa li pauyuki, ano inali hala oku mu futa ngaashi ye a hala a futwe.

Omusamane Kalenga ota lombwele The Namibian , okwa ti wa na ze po pehala lye mpoka molwashoka aniwa otapu tungwa enongelo lyaanona . Kalenga ta ti ye mwene ke na uudhigu wokuza po, a yapukile ehumokomeho ndyoka, ihe oku na uudhigu wElelo inaali hala oku mu futa pauyuki na ka li na elongelokumwe naye moshinima shika. Ta ti aanambelewa ohaye ya ashike mehala lye moka nenge megumbo lye moka yaa na epitikilo nokuninga shoka ya hala, yo natango inaye mu futa opo yiipaathane nawa ehala lye ndyoka. Kalenga ota nyenyetele wo Elelo lya Kahao kutya olye mu lombwela pamwe nomushiinda she meme Aino Amukwaya, kutya nuumvo inaya lima oshoka mboka taya tungu osikola pomahala gawo mpoka, otaya tameke nziya okutunga. Ta ti oya zimine noya kala inaya lima nuumvo, ashike nee sigo oompaka inapu tungwa sha.Oya kelelwa ashike owala yaa lime iilya yawo. Ta ti ngeno oya limine ngeno oya mona mo ngaa iilya ngashi yakwawo yopomaushiinda gawo mpoka. ‘ Sho nee inatu lima ngeyi, inatu mona iilya, iipalutha yetu naanegumbo yetu, tse inatu futwa natango, otatu kalya shike? Otatu ka hupa ngiini, na otatu ka hupila peni? tate Kalenga, ngoka e li mepya lya tate gwawo Kalenga, lya kala po oomvula tadhi ihilile pethele nenge dhi vule po, ta pula ngawo nokutsikila ko ta ti Aanambelewa yElelo lya Kahao sho taye ya puye nenge puyo mpoka, otaya ti naya ze po oshoka aniwa oya tunga pevi lyElelo lya Kahao, lyEpangelo. Tate Kalenga ota ti kutya oshinima shokutya naya ze po pomahala gawo mpoka oshe ya adhele momumvo 2007, unene tuu momumvo 2008, noya kala taya kundathana nElelo lya Kahao kombinga yofuto.Ta ti oshinima shofuto osho nee sha kala inashi yela nElelo lya Kahao olya yi ashike mekuni nokugandja elombwelo lyuukilila kutya naya ze po. Tali ya futu, pathiminiko, okamaliwa komwaalu gwontumba nokukutha nee etokolo kutya naya ze po inaya lima po we mpoka. Tali ya lombwele wo kutya naya kuthe po nenge naya hanagule po omaloogolo, ano oongumbu dhawo kuyoyene, kutya nee odhiihwa nenge odhoondhalate. Shika tate Kalenga ota ti kashi li pauyuki nandenande.Manga nee ye li moombata nElelo lyawo ngawo, Amushanga Omukuluntu gwUuministeli wOmapangelo gOpaitopolwa, Omagumbo nEhumithokomeho lyIitopolwa yokomikunda tate, Erastus Negonga, okwe ya noku ya ningila oshigongi pamwe nElelo lyawo, moka tate Negonga a ulike aniwa omunwe tate Kalenga noku mu lombwela meukililo kutya na ze po pehala mpoka ngashi a lombwelwa ngele hasho otaka ungaungiwa naye kepangelo. Omalaka ngoka, tate Kalenga ota ti oge mu uvitha nayi shi vulithe molwashoka okwa li a tegelela ngeno Amushanga Omukuluntu a kuthe po omasipa pokati koombwa ano pokati ke nElelo lya Kahao.Okuza mpoka, tate Kalenga okwa ti kutya okwa shangele kOministeli yOmapangelo gOpaitopolwa, Omagumbo nEhumithokomeho lyIitopolwa yOkomikunda tate Jerry Ekandjo, te mu lombwele uudhigu we mbuka, ashike aniwa na Minista ,Ekandjo ine mu yamukula sha sigo okonena ndjika. Ngashi ngaa e shi lombwele Amushanga Omukuluntu Negonga, okwe shi lombwele wo Minista mombapila ndjoka e mu shangele kutya, ye ota pula a futwe OoN$150,000 mohekta.Ta pula wo a futwe OoN$200,000 molwashoka ina lima nuumvo, opo e kiikongele shoka a kanitha sho inaa lima. Ngele nee ta zi po pehala lye mpoka a ye kehala limwe ndele kaku na olusheno, na tulilwe ko olusheno lwolwene nenge ndoka lwetango nenge okashina kolusheno. Nge oku na omunino gwomeya na tu lilwe po omeya pehala lye epe mpoka nenge nge kapu na omunino na tulilwe po otenga yokukwata omeya naandjoka yokututa omeya. Ta ti wo kutya iiti yegumbo lye nayao nayi futwe, kehe shimwe ooN$10. Ta ti wo kutya, kakele komiti dhiiyimati ndhoka tadhi futwa, naandhoka itadhi yimi iiyimati nadhi futwe, oshoka odhe mu hepeka oku dhi kwatela po, okudhi sila oshimpwiyu nokudhi kaleka pomuthika gwokuwapeka omudhingoloko.Mokumonathana nOmunambelewa Omukuluntupitithi gwOndoolopa ya Kahao, tate Gisbertus Mukulu, okwa lombwele The Namibian kutya ke uvite ko enyenyeto lya tate Kalenga, oshoka okwa zimina a ze po pehala mpoka kwali nokwa futilwe nale oshimaliwa she shokuza po pamulandu omukulu gwEtokolo lyOkabinete gwokufuta mboka taya yapukile omahumokomeho miilando . Mukulu ta ti uudhigu wu niwe kwali ku tate Kalenga owo kufutwa pamulandu omupe ngoka opo gwa tulwa po kOkabinete omvula ya zi ko, ano ngoka tagu ti kutya oshimalwa shoka shi gwedhwe.Mukulu ta ti sho nee Okabinete ka ningi po etokolo ndyoka, osha yela kutya ayehe ya kuthilwe pomahala gawo noya futilwe pamulandu omukulu, tate Kalenga naye a kwatelwa mo, otaya ka futululwa ishewe. Onkee nee, Mukulu ta ti, na tate Kalenga, meme Amukwaya, nayakwawo yalwe, otaya ka futululwa. Mukulu ta ti, tate Kalenga na meme Amukwaya, nge oye ya kElelo nena, otaya ka futwa oshimaliwa shawo shoka shi li ko, oshindji lela. The Namibianokwa kundana kutya tate Kalenga, oya li moonkundathana nElelo lyaKahao ohela mEtine kombinga yoshinima shika.