Kaaronda okwi inekela kutya otaka galulilwa iilonga ye po NUNW

AMUSHANGANDJAYI nale gwondundahangano yopashigwana yaaniilonga ya Namibia[NUNW] Evilastus Kaaronda okuna einekelo kutya ota ka galulilwa iilonga ye kuyele tashi vulika oshiwike tashiya. Omukalelipo gwe gwopaveta, Clive Kavendji okwa popi einekelo lye kutya moshigongi she tsokumwe tashi ningwa nena poombelewa dhA kOmufala gwaaniilonga otashi ka tokola muuwanawa womuyakulwa gwe.

Oshiwike shayi Kavendjii okwa tile Kaaronda okwa li ena edhiladhilo oku ya kohofa Onene yoshilongo oku kiindila opo a shunwe miilonga ye.Kavendjii okwa ti ompito ndjika natango oyeeguluka okulongithwa. Omupanguli ta kwathel, Petrus Unengu kuyele oshiwike sha yi okwa li eekelehi eindilo lya Kaaronda lyomeendelelo, moka ali ta pula okushunwa miilonga ye yuuhamushangandjayi. Ndele etokolo lyomupanguli nguka okweekelahi eindilo ndyoka ongo inaali endelela olya li lyuuvitha nayi Kaaronda nohahende ye.Kaaronda okwa li indile ohofa yopombanda meendelelo opo yi gandje elombwelo kutya na shunwe miilonga ye opo a vule oku ka kala poshigongi oshinene shoSwapo shoka shili metifa moVenduka okuza etine oshiwike shika.Kaaronda okwa li gumwe gwaamboka ya ulikwa oku kakala poshigongi shika kohi ya NUNW. Moku kondjitha eindilo ndyoka Alfred Angula amushangandjayi gwopevi gwa NUNW okwa ti eindilo ndyoka ita li vulu oku kala lyomeendelelo oshoka oku ya kokongressa yoSwapo hasho oshitsa oshinene tashi ningitha eindilo ndyoka li pulakenwe meendelelo.Ishewe oku ya kwa Kaaronda kokongressa yoSwapo okwa li kwa tokolwa pethimbo ye ali omuwiliki gwa NUNW. Omusholondondo gwiikundathanwa yopokongressa ogwa tungwapo ku Swapo ndele inagu tungwapo kuNUNW. Onkene Kaaronda ita vulu oku popya kutya osha pumbiwa oku ka kalelapo uuwanawa waaniilonga.Kaaronda okwa tidhwa miilonga aniwa oshoka ota humitha komeho etopoko mokati komahangano gaaniilonga;.