Jooste a thiga po Okabinete

OMINISTA yopevi yEgameno lyUuntshitwe nOmatalelopo, Leon Jooste, okwa thigi po iilonga ye nosho wo oshipundi she mOmutumba gwOpashigwana, pamatompelo ge na sha neso lya tate gwe omumvo gwa zi ko.

Mombelewa ye oti ihulu mo nena. ‘Tate gwandje (nakusa), ngoka a li kala ko Cape Town mu South Afrika, okwa thigi po Okampani onene yi na iitayi yopaigwana na ong’ofamili, otu na okuninga omatokolo ga omanene ngoka ga eta ndi kwatele komeho Okampani,’ Jooste osho a lombwele The Namibian ngaaka mEtine.
‘Otashi ka kala oshidhigu ku ngama okukala niilonga yandje yUuministeli naambyoka yOkampani,’ ta tsikile ko ngaaka. Jooste okwa ti oshinima shika okwe shi kundathana nale nOmupresidende Hifikepunye Pohamba kuyele mu Novemba.
‘Okwa li u uvu ko lela onkalo moka ndi li netokolo ndyoka nda ningi. Ihe Omupresidende okwa ningi eindilo kutya etseyitho mu shika nali ningwe ashike konima yOkrismesa,’ Jooste ta popi.
Nande ongaaka, oshikundaneki shimwe shomoshilongo osha lopota kutya ’embendango’ lya Jootse oli na sha negandjo-landitho lyoopelemeta dhokuyaha iiyamakuti ndyoka lya li lya kalekwa kUuminisyteli manga kwa li ashike ku na omasiku omashoka li ningwe.
Oshinima shika okwa li shi na okuningwa momasiku 19 ga Desemba 2008. Otaku popiwa kutya egandjo-landitho lyoopelemeta dhika olya kalekwa molwashoka aniwa aaluudhe kaya li taya mono mo sha. Ihe Jooste okwa ekelehi kokule omapopyo ngaka, ta ti kutya mbika iifundja iitokele.
Jooste oya tuta nale nofamili ye ya ka kale ko Cape Town. Jootse okwa li tango a ningwa Ominista yopevi nOmapangelo gOpaitopolwa kOmukokolipresidende Sam Nujoma momumvo 2004 na momumvo 2005 okwa ka ya nee kUuministeli wEgameno lyUuntshitwe nOmatalelopo.