Jonas Johannes gwomOmaalala a pewa okugulu kwopaunongononi

JONAS Johannes (32) omukalimo gwOmaalala, ngoka kanithile okugulu kwe metopo lyomboma, ota vulu okweendanawa ishewe, tangi komagano gokugulu hoka a pewa kehangano lyopaumwene lyokulonga iilongomwa yokweendithwa kiilema lyedhina Namibia Private Orthopaedic Centre (NamPOC).

Pethimbo lyegandjo lyokugulu huka ku Johannes,ga gandjelwa poombelewa dhehangano ndika pOngwediva, Johannes oku ulike enyanyu lye sho a tambula ookugulu kwe okupe. ‘Onda nyanyukwa noonkondo nena nondi na elala enene. Okuza nena otandi vulu okweenda nawa ishewe noku longa iilonga yandje ngaashi shito,’ Johannes ngoka e ya te ende komampang nota shuna te ende pwaa na ewatelo lyomampango, ta popi ngaaka. Nonando Johannes okuna uulema wokugulu, okwa tumbula kutya oha kambadhala okukalekapo onkalamwenyo ye nokulonga iilonga yomatungo. Omolu iilonga ye mbika iidhigu ha longo, okugulu hoka kwali ha longitha omuvo gwa zako okwa kulupa nokuteka. Onkee okwa kala ha longitha omampango okwiinyenga okuya kehe mpoka a hala okuya. Pethimbo ta gandja omagano ngaka, Martin Nehale (Ndokotola miikwamagulu) gopaunonononi okwa ti, ‘ehangano lyetu otali lalakanena okuwatela aanuulema yi ithikane po noya vule okukala taya longo iilonga yawo mokuudha, mokuyapa iilongomwa yopaunongononi ngaashi omagulu, uutemba, oongaku, omampango, niilongomwa iikwawo,’ Nehale ta popi ngaaka. Okwa gwedha ko kutya oyena ehalo okuwatela aantu oyendji, ashike molwaashoka iilongitho yokulonga iilongomwa mbika ohayi monika ashike koSouth Afrika yo oyina ondilo, shika osha ningi oshidhigu okugwanitha omadhilaadhilo gawo gokukwathela. Okwa hokolola kutya shika osho oshikando oshitiyali taya gandj omagano gokugulu konima sho ya gandjele omagano komugundjuka omunasikola moseko ya Mweshipandeka mOngwediva.