John Walenga a ningwa elenga enene lyOshikandjo shUulenga sha Ndangwa

ELELO lyOndonga mewiliko lyOmukwaniilwa gwOndonga tatekulu Immanuel Kauluma Elifas, mOlyomakaya ga zi ko, olya langeka omunangeshefa omugundjuka nOmunapolotika John Nangombe Walenga ongElenga enene lyOshikandjo shUulenga sha Ndangwa, Oshikandjo shoka taku tiwa kutya shimwe shomIikandjo yUulenga iinene mOndonga.

Tate walenga okwa yi pehala lyElenga enene lyOshikandjo shoka sha Ndangwa kwali nakusa tatekulu Johannes Amakali ngoka a manene oondjenda dhe meti 12 Desemba 2008 konima sho a li a mono oshiponga shohauto ongula onene yeti 2 Novemba 2008 mondjila onene yopokati kOndangwa nOshivelo.
Pethimbo lyelangeko lye, ndyoka lya ningilwa pegumbo lye mOndangwa mOlyomakaya ga zi ko, Omukwaniilwa tatekulu Elifas okwe mu halele oonkondo nompolo ombwanawa moshilonga she oshipe ongalimwe lyomOmalenga omanene ge gomOndonga.
Omukwaniilwa ta lombwele omusamane Walenga kutya na kale ta galikana ku Kalunga ke opo e mu pe oonkondo, oondunge, uunongo nomukumo miilonga ye yokuyakula oshigwana she.
Omunashipundi gwElelo lyOndonga Elenga enene lyoshikandjo shUulenga sha Ngulayanetanga, tatekulu Petrus Kauluma, okwa lombwele Elenga enene epe Walenga kutya na kale ta longo nokuyakula oshigwana she pauyuki nopwaa na okatongotongo. Omusamane Walenga okwa uvaneka ta ka kala nokuvulika kOmukwaniilwa noshowo okuvulika kOompango nokOmautho agehe gElelo lyOndonga nogOpamuthigululwakalo gwOndonga nokulela oshigwana e shi inekelelwa palandulathano lyEkotampango lyoshilongo.
Oshituthilangeko she shika osha li sha kalwa koyendji lela yomElelo lyOndonga noshowo kAalelwa ye yomOshikandjo shoka sha Ndangwa, aakwanezimo, ookuume noshowo kAawiliki yOpamuthigululwakalo yokIitopolwa yilwe, mwa kwatelwa nElenga enene lyAaherero omusamane Kuaima Riruako nongundu ye yOmalenga ge gamwe noshotu kAawiliki yOpambepo nayalwe wo yOpashigwana noyOpapolotika.