Jesaja Naukosho i igandja ye mwene kOpolisi

O
MULUMENTU ngoka oye awike a li ina kwatwa po (e li oshilyo shOngenga yaalumentu mboka ya li yi iningitha ya fa Aapolisi opo ya kuthe omukulupe gumwe gwopoSwakomund oshimaliwa sha konda pOondola petata lyomiliyuna), okwi igandja kOpolisi mEtitano.

Oshiwike sha zi ko, Opolisi ya Namibia oya li ya ningi eindilo koshigwana shi yi kwathele molukonga la Jesaja Naukosho.
Naukosho okwa li nee a holoka mOmpangu ya Mengstrata mOvenduka moshipotha shokwiiningitha a fa Omupolisi, shethino, shekwatombambyona noshuufuthi, molwashoka okwa li a adhika ninima ya yakwa.
Naukosho okwa li a tindilwa ombooloha na okwa tegelelwa a ka holoke ishewe mOmpangu nayakwawo ya li ya hetatu momasiku 26 ga Maalitsa. Otaku popiwa kutya Naukosho nayakwawo, omumvo gwa zi ko oya li ya kuutumba nokweeta po opulanda ya nkene ye na okukuth omukulupe nguka oshimaliwa.
Omukulupe nguka oya li nee aniwa ya landitha kuye omamanya, ihe konima yethimbo iilyo yimwe yongenga ndjika oye ka thikama omukulupa nguka – tayi kutya kutya yo oye li Aapolisi.
Ongenga ndjika oya li aniwa ya ya kutha omukulupe nguka oshimaliwa (mokumu landitha omamanya shaa li paveta), iikando oyindji na oshikando shimwe, oya li wo aniwa ye mu kwata po ombambyona.
Ya li aniwa ye mu thiminike a kale mOhotela mOvenduka, manga taya mu thina oshimaliwa. Oshinima shika osha ka monika mo ashike sho aniwa aanona yomukulupe nguka ya dhimbulula kutya, he okwa kanitha ombili e taye shi lopotele Opolisi.
Opolisi oya popi kutya iilyo yongenga ndjika oyi na aniwa uumutse wa kilikita wiifundja wOpolisi na ohayi popi kutya ohayi longele Oshikondo shOmaliko ga gamenwa shOpolisi.
Naukosho oku na wo oshopitha shokudhina oveta, sho a li a ndopa okuholoka mOmpangu momasiku 23 ga Septemba 2008. Aapolsi oya popi kutya Naukosho oye oshilyo sha hugunina shongenga ndjoka shoka sha li natango tashi kongwa, ihe otashi vulika natango pu ka kwatwa aantu yalwe.