Iyambo a tsakaneke oonakulwa aakulu komunkulofuta

OONAKULWA aakulu oya pumbwa ehungomwenyo kombinga yomaudhigu konima yiita yekondjelomanguluko, oya pumbwa ekwatho lyopaunamiti, nokonyala oodola 3 000 omwedhi kehe ngele iimaliwa iishona ye na oku pewa.

Omaindilo ngaka gamwe gomwaangoka ga pewa ominista yoonakulwa aakulu, Nickey Iyambo pethimbo a li a tsakanene nongundu oshona yaambaka, moshilando sha Swakopmund ehuliloshiwike lyapiti.
Iyambo ngoka oye ngashingeyi omunani guuministeli woonakulwa aakulu okwa li metalelopo poSwakopmund na Walvisbay pehulilo shiwike okutseya nawa onkalo yoonakulwa aakulu yokombinga ndjoka.
Okwa zimine pwame nayo kutya epangelo olya dhimbwa po oshinima oshinene shehungomwenyo.
Pahapu dhe okwa ti opena omathaneko gontumba kombinga yeyakulo lyoonakulwa aakulu. Okwa ti gamwe gomwaangoka ongaashi oku ya pa omwaalu gwontumba gwaashiwike ongo epandulo kuyo, noshowo oku futila omafumviko gawo, mwa kwatelwa nedhiko lyomamanya koombila dhawo.
Okwa ti uuministeli we otawu dhiladhila woo okutungila oonakulwa aakulu omagumbo , mboka ya lemana omolwa ekondjelomanguluko.
Iyambo okwa indile oonakulwa aalukulu opo ya kale neidhidhimiko, oshoka uuministeli we owi ipyakidhila natango noku shangitha oonakulwa aakulu yomaludhi gi ili no gi ili miitopolwa ayihe yoshilongo.Okwa ti omolwaashika, otashi pula ethimbo opo oonakulwa aakulu ya mone eyakulo mbala.
Oonakulwa aakulu oya ti yo oya loloka oku tegelela oya li ya tegelela okukala ya yakulwa nale omathimbo ga piti.
Iyambo okwa yamukula kutya oku uvite pamwe nayo , kakele epangelo olina iinakugwanithwa oyindji.Ishewe opena omaiyuvo mokati koonakulwa aakulu kutya ofuto yoodola 2000 koonakulwa aakulu yaanaa iilonga nenge mboka yena iiyemo iishona ota yi ningwa pakutongola.Iyambo okwa ti opena omishangwa dhoonakulwa aakulu odhindjidhindji ndhoka dhina oku longwa opo kehe gumwe a vule oku mona oshimaliwa she.Pahapu dha, Iyambo kehe omuntu a ninga sha mekondjelomanguluko ota, talikako ongo nakulwa omukulu. Mbaka ota shi vulika ya kwatelamo nookuli naakwiilongo.