Indileni omikuli odhindji muye komeho

OMUNAMBELEWA omukuluntupitithi gwoMbaanga yomapendulepo ya Namibia, okwa kumike aanangeshefa ya indile omikuli opo ya vule okuhumitha komeho oongeshefa dhawo.

David Nuyoma okwa kumike aanangeshefa ya kale nombepo yokwiindila oshindji opo ya longe nawa noshindji mokungeshefa. Okwa ti moshilongo omuna uunkundi wokugandja iimaliwa okukwathela elongo nawa muunangeshefa. Okwa ti okwiitala oshinima shika otashi ka lundululwa. Nuyoma okwa popi ndhika oshiwike shapiti poKaiti. Nuyoma okwa li a kwatele komeho olweendo koshitopolwa sha Karas nosha Hardap oku tseyithila aanangeshefa kombinga yomayakulo ngoka ombaanga ye hayi gandja kaanangeshefa nokutala eyokomeho lyoongeshefa ndhoka dha dhikwapo niimaliwa ya gandjwa ko DBN. Nuyoma okwa ti ombaanga ye oyina aayakulwa oyendji ngashingeyi miitopolwa mbyoka unene tuu moKaras moka aanangeshefa ya pewa omikuli dhomwaalu gwoodola oomiliona 126 dha pewa aanangeshefa ye li omilongo 26.Aanangeshefa mboka oye li miikondo ngaashi shoka shoohi, nomatungo. Nuyoma okwa ti opena uutile kombingha yoombaanga omolwa onakuziwa, ndele osha pumbiwa okuteyapo uutile mboka.