Indeni mu ka konakonwe HIV-AIDS: Kashuupulwa

PETHIMBO ta tula miilonga oshikonga shokwiikonaakonitha ombuto yoHIV-AIDS mOshakati mOshitopolwa sha Shana ongula yEtitano lya zi ko,Gavena yOshitopolwa sha Shana omusamane Klemens Kashuupulwa okwa indila koshigwana ashihe shomOshitopolwa sha Shana, shi kiikonaakonithe kombinga yombuto yomukithi gwo HIV-AIDS opo kehe gumwe a kale e shi mpoka a thikama nomukithi nguka nenge nombuto ndjika yo HIV ndjoka hayi vala omukithi omudhipagi gwo AIDS.

•OSWALD SHIVUTE
Oshikonga shika osha tameke mEtitano lya zi ko lyeti 8 Mei 2009 notashi kala ko sigo ongula meti 12 Mei 2009. Aantu taya konaakonwa okuza pohetatu yongula sigo okwaandjoka yokongulohi.
Manga ina ninga oshipopiwa she, Omukuluntu gwOshipangelo shoka shEpangelo sha Shakati Omundohotola Shannon Kakungulu yo nOmuwiliki gwUuhaku moshitopolwa sha Shana Omundohotola Naftali Hamata, oya ti kutya Omaikonaakonitho gonuumvo oga ukilila unene moonakwiihokana noshowo mwaamboka ye li pamwe nenge haya kala pamwe, oyo unene taya pulwa ye
kiikonaakonithe momaikonaakonitho ngaka taga ningwa oshali.
Omundohotola Kakungulu ta ti kutya opwa pumbwa okuningwa sha oshinene molwashoka Namibia gumwe gwomiilongo itano mo Africa mbyoka yi li unenenene kohi yomukithi nguka omudhipagi gwo HIV-AIDS.
Omundohotola Kakungulu ta ti ngashi mOshipangelo shEpangelo sha Shakati mesiku kehe ohaya ungaunga naantu ye li omathele gaali nosho tuu mboka ye na sha nomukithi nguka gwo HIV-AIDS.
Gavena Kashihakumwa ta lombwele ayehe mboka ya li petulomiilonga lyoshikonga oshitiyali sheikonaakonitho lyombuto nyo HIV-AIDS mOshipangelo shEpangelo sha Shakati moka kutya okwiinekela kutya noshikonga shika shonuumvo otashi ka enda nawa ngashi shomvula ya zi ko.
Ta pandula Uuministeli wUuhaku naayehe mboka ya notaya kutha ombinga
momalongekidho goshikonga shika sha simana. Naye ta ti kutya otaku indilwa unene oonakuhonathana naamboka ye li pamwe omulumentu nomukiintu oyo yee unene yi ikonaakonithe moshikonga shika.
Aagundjuka, oshigwana shokomongula nasho wo otashi indilwa shi ye shi ikonaakonithe opo shi kale shi shi mpoka sha thikama nomukithi nenge nombuto ndjika yo HIV-AIDS.
Gavena Kashuupulwa ta ti, ehungomwenyo opo li li lyiihwapo nawa, tali pewa omuntu manga ino konaakonwa, ano manga ino kuthwa ombinzi. Kashuupulwa ta tsu ayehe tayi ikonaakonitha omukumo kutya ngoka to ka monika ombuto ndjika, wu kale wa taamba ko nokutsikila to lumbu nonkalo yatya ngawo, na ino tsikila oku yi kuna, naangoka nee ito ka monika ombuto ndjika, wu tameke to ikwata nawa nokwiikelela waa kwatwe kuyo.Gavena ya Shana ta pandula Omahangano ngoka haga kwathele Uuministeli wUuhaku nIilonga yOnkalonawa noshowo Omalelo gIitopolwa mokuungaunga nomukithi nguka omudhipagi gwo HIV/AIDS mokati koshigwana.
Omahangano ngashi nee; TCE, Nawa Life, Ehangano lyOmushigakano Omutiligane no Catholic AIDS Action kumwe na ELCIN AIDS Action nosho tuu, sho taga kondjo pamwe mekondjitho lyomukithi nguka omudhipagi gwo HIV-AIDS. Pehulilo, Gavena ta ti, kehe gumwe inda wu kiikonaakonithe pOshipangelo, pOklinika noshowo pOsenda ndjoka yi li popepi nangoye.