Inda kwi – Nujoma komapulo oifendela

Ominista yoilonga, omakwatafano oikwafabulika nokutota eemhito doilonga Utoni Nujoma Etitatu okwa lombwela oThe Namibian kutya nai ye kwinya.

Eshi okwa li sha ningwa konima minista mukulu wedu a pulwa kombinga yokukala umwe womwaavo ve na omadu ashike ova pewa oufemba wokukala ihava futu oifendela.

Epangelo ola yandja ouwa wokuhafuta oifendela yedu wongushu yoshimaliwa shi fike peemiliyona N$2.

“Inda kwi,” Nujoma osho a ti ngaho, ina yandja vali ouyelele wa wedwa po.

Ovanenenhu vamwe vomoshiwana ovo navo va pewa oufemba wokuhafuta oifendela yedu pefimbo opo omwa kwatelwa Doris Wilke (N$71 185,23), Albertina Munomava naLea Mupaine (N$64 566), Inge Hennes (N$61 256,87), Agnes Karumendu (N$51 262), NaAletetta Muller (N$43 944).

Omusholondodo owa kwatela mo Nujoma (N$19 242,15), omuleli wongudu yoPopular Democratic Movement McHenry Venaani, Mike Kanjonekere naClaudina Venaani (N$25 720), minista mukulu woundjolowele Richard Kamwi (N$43 322), omunangeshefa akula Vetumbuavi Mungunda (N$48 375) naMonika naSonja Thieme (N$31 465).

Ouwa ou wokuhafuta oifendela yedu owa dja poN$25 fiyo opoN$20 000. Oshinima eshi okwa li sha yandjwa moshimaliwa shokomudo 2016/2017 fiyo 2020/2021.

Ongeleka yaCatholic okwa li ya pewa oufemba wokuhafuta oshimaliwa shi fike poN$605 583, osho li pombada komivalu adishe odo kwa li da pewa ovanhu oshilongo ashishe.

Omusholondodo, oo kwa li wa shiivifwa pambelewa Etivali la dja ko, owa kwatela mo eengeleka di li 11, omatungu oo nakufya vatano nosho yo ohaandimwe 566.

Okatendo komalunduluko omatendululo omadu oka yandja oufemba kuminista opo a kaleke ovanhu vaha fute oifendela medu lounamapya nounaimuna ngee va wanifa po oinima yonumba.

Oinima ei oya kwatela mo keshe omunhu e na edu lounamapya nounaimuna, ashike ongeenge ashike omunhu oo e li mongudu yovanhu ovo va tumbulwa mokatendo okati23 kekotamhango laNamibia.

Ava ovanhu ovo va kala nokutongolwa nale molweeveta noinima yokatongotongo, ile etulomoilonga lomilandu neepolohalama tadi lalakanene okuxwepopeka okuhafikepamwe kwopanghalafano, omaxupilo nosho yo ehongo.

Omundjadjukununi woikwapolitika Erika Thomas okwa ti ngee okwa talika omaxupilo ovanenenhu nawa, itashi popile nande okukala itava fendele.

“Ngee oto ti omadina oo okwa kwatelwa mo momusholondodo ndee fyee otu shi onghalo yomaxupilo avo, kwaame itashi ka kala nande ovanhu ovo tava mono oixuna,” Osho a ti ngaho.

Thomas okwa twikila nokutya ovanapolitika vamwe ava okwa li tava ti navo Ovanamibia novapumbwa okukala va kwatelwa mo mu keshe shimwe tashi ningwa kepangelo laNamibia.

“Ashike ngee owe shi tala nawa okudja keembinga da yooloka, nena otashi i keefaalama doimuna. Meefaala doimuna oinamwenyo aishe i fike pamwe, ashike moufiku ashike umwe oshingulu ohashi lundulula eemhango, kutya hashi namwenyo sha nu omashini naikwao ihapu.

“Ashike pexulilo lefiku, shaashi oingulu okwa li oyo i na eendunge mokati koinamwenyo ikwao, oya lundulula eemhango moufiku ashike umwe ndee tai tameke okutya oinamwenyo aishe oi fike pamwe ashike oinamwenyo imwe oi fike unene pamwe i dulife ikwao,” Osho a ti ngaho.

Omutotiveta Joseph Kauandenge okwa itavela kutya oshinima eshi “okuyola ovanhu” ovo ve li moshiwana tava mono oixuna ndee oveta oyo nai totwe i yandje omauwa kovanhu va hepa moshiwana.

“Opu na omumbwe yakula yokutalulula oshinima eshi shoveta yokafudo kokufuta oishoshela ndee taku popiwa kutya okwa li naana taku lalakanenwa shike petameko,” Osho a ti ngaho.

Kauandenge okwa ti itapa kala oveta oyo tai yandje ile tai fatulula ovo ve na nale ponhele yaavo va pumbwa okafudo koifendela moshili.

“Ndee eshi tashi limbililike ovanhu vamwe ovo ve li momusholondodo omo inava pumbwa shili okafudo koifendela. Oshipu okutya ngeno okwa li vehe lihole,ngeno ovaanya okafudo kokufuta oifendela ndee tava pula nande epangelo li tule oshimaliwa ile li fute ovo va pumbwa shili okafudo koifuta yokongulu,” Osho a ti ngaho.

Omuleli wongudu yomilameno yopambelewa Venaani okwa ti oveta otai totwa okuvatela okuhena ouyuki kwokutopola edu oko kwa li po eshi oshilongo opo sha manguluka, onghee nee ovalaule otava dulu okupewa ouwa ou.

“Keshi Venaani tai a ka kengelele okufuta oifendela. Oshi li po nale kutya ngee omunhu omulaule ota dulu, oho mono ouwa wokuhafuta oifendela yedu yawana po. Omolwashike? Omolwokuhafikapamwe panghalafano kwomonakudiwa,” Osho a ti ngaho.

Okwa ti kashi na sha kutya omunhu omhupanguli ile omuleli. “Oshinima nale shi li po ngee to lande ofaalama. Ngee oumulaula ndee kwa li nale u na ofaalama, oto dulu okumona ouwa ou. Oveta yoshilongo,” Osho a ti ngaho.

Venaani okwa ti ovanhu ovo va pewa ouwa wokuhafuta oifendela yawana po ovo vo ve li meengudu nhatu.

“Yotete, eeveta nomilandu dokuxwepopaleka onghalo yovanhu aveshe. Oshitivali, ovakainhu. Oshititatu, ovo vo vehe na oiyemo.

Paife, oveta eshi kwa li ya shangwa momudo 1995, okwa li ya nuninwa i kale oveta yomaxupilo nosho yo oveta yokuxwepopaleka onghalafano,” Osho a ti ngaho.

Okwa ti ina ninga sha nande shapuka eshi a itavela oshinima shi li ngaho shokuhafuta oifendela ye lixwa po.

“Kapu na nande oveta oyo nda teya eshi nda tambula ko oshinima eshi. Oveta tai ti nandi mone ouwa ou. Kashi shi ngeno kutya opwa ningwa omalongekido onumba kwa li nde a ningilwa ile omunhu umwe,” Venaani osho a ti ngaho.