Inatu galulineni uuwinayi mboka taye tu hindi

PETHIMBO ta popitha oshigongi oshinene shoSwapo pOkaku popepi nOndangwa mOshitopolwa sha Shana, Oministeli yOmidhingoloko nOmapashiono, meme Netumbo Nandi Ndaitwah, okwa indila kAakwaSwapo kaya galulile yOongundu dhOompilameno uuwinayi uuna taye ya hindi.

Meme Ndaitwah ta ti mboka yoongundu dhoompilameno ohaya kambadhala okuhinda mboka yOswapo nelalakano lyokuyona omahogololo. ‘ Ngele taye tu hindeni, inatu ya yamukula.Tu longitheni oompito ndhoka dhi li po ngele taye tu hindi, dhokukalopota kOpolisi, oyo yi ungaunge nayo, ihe tseni inatu ikuthileni onkalo ndjoka momake getu. Yo kaye na shoka taya kanitha momaihumbato gawo ngoka, oshoka kaye shi Epangelo, ihe tseni mba tu li Epangelo, ngele otwe ya yamukula moku ya shunithila oluhindo lwawo, nena aantu otaya ka tala kutse mba tu li Epangelo nokuulika oshiholelwa shetu oshiwanawa, ‘ Mee Ndaitwah ta ti ngawo nokugwedha ko ta ti ‘ AakwaSwapo tu kaleni twa kwatela po ombili ya Namibia naantu yamo.Mboka taye tu shongo, inatu ya yamukuleni. Yo itaya kanitha sha. Tseni ongEpangelo otseni tatu kanitha. Tu ka hogololeni ndele tatu ke ya dhenga mo nomawi, ano nopena nokutsikila nEpangelo lyetu ngaashi twa kala. Tu ka hogololeni nombili yetu noku yi kwatela po nawa, ‘ Me Ndaitwah ta ti ngawo nokugwedha po ta indile kOshigwana shOswapo shi ye shi ka hogolole nawa, shi ka hogolele Oswapo yasho nOmupresidende gwasho Hifikepunye Pohamba momahogololo ngoka tage ya gOpaupresidende nogOshigongi shOpashigwana, taga ka kala ko meti 27 neti 28 Novemba 2009.Meme Ndaitwah ta ti Oswapo oyo Ongundu ya mangulula Namibia noyi na okukala oyo tayi pangele Namibia, ngashi tayi ende tayi hogololelwa koshipundi koshigwana sha Namibia paudemokoli.Ta ti mboka taya uhala taya ti kutya Swapo ina longa sha kaye shi shoka taya popi. Minista Ndaitwah ta ti, Oswapo sho ye ya kOshipundi, oya tunga oosikola otayi tsikile noku dhi tunga. Tayi tungu Iipangelo nUuklinika notayi tsikile natango noku shi ninga. Tayi tungu oondjila nomagumbo nokugandja omeya nolusheno koshigwana noshowo omiti dhokupanga aavu naandhoka dhokulepeka onkalamwenyo yaamboka ya kwatwa kombuto yo HIV/AIDS.’Mboka nee taya ti kutya Oswapo ina yi longa sha, kaye wete ko, na yo otaya ka longa po nee ishewe shike mpoka, ngele ayihe oya tamekwa nale nokutungwa po kOswapo ya Namibia, ‘Me Ndaitwah ta ti ngawo. Ta indile aanyasha ya Namibia mboka ya thika okukahogolola, ya ka hogolole ya mana mo Oswapo yawo. Ta ti, moNamibia omu na omupopyo tagu ti kutya, aanyasha aniwa oya ya mOongundu dhoompilameno. ‘Onda hala mu ke ya ulikile momahogololo ngoka tage ya kutya ne kamu li mOongundu dhoompilameno. Omu li mOswapo yeni. Ano ke ya ulikileni mokuhogolola Oswapo yeni momahogololo twa thinda mo noku yi shuna koshipundi, yi ka tsikile nOoprograma dhayo dhokuhumitha komeho oshilongo shika noshigwana shamo,’ me Ndaitwah ta ti ngawo nokugwedha ko ta ti moNamibia kamu na we ongundu yimwe tayi ka eta po ehumokomeho yi vulithe Oswapo.Ta ti shapo oya hala ya ka kelele ehumokomeho, yo naya kale ye shi shi kutya ngoka ta kelele ehumokomeho ota yono notiipetha ondjo moshinima shoka. Ta ti omuti nguka, Namibia ogwa pumbwa okukalekwa po gu li nawa, gwa kokolwa nawa, gwa tekelwa nawa nokukala mpoka tagu imi iiyimati yili nawa, iiyimati yombili nehumokomeho. Minista Ndaitwah ta pandula AakwaSwapo ayehe, unene tuu aaleli yomOshana moka mu na Oshikandjohogololo Okaku.Omuunganeki gwOswapo mOshitopolwa sha Shana omusamane Erastus Uutoni, ngoka e li mOmusholondondo gwAahogololwa yOswapo okuya kOshigongi shOpashigwana, okwa ti kutya oongundu dhOompilameno odhe shi dhimbulula mo kutya ondjundo ya ninga ondhigu na kadhi wete we sho tadhi ningi, nonande tadhi kwathelwa kiikundaneki yimwe. ‘ Taya ti otaya eta po elunduluko. Elunduluko lya shike? Uutoni ta ti nokupula ngawo. Ta ti kutya nee oya kale ye na omathano gawo ge li moondoolopa moka, ya etheni ashike. ‘ Tatu ke ya dhenga mo shito momahogololo. Naye ye mondambo tu ye, tu ya dhengemo mo nawa,’ Uutoni ta ti ngawo.