Okandidate koupelesidente koSwapo Netumbo Nandi-Ndaitwah oka holola elimbililo kombinga yokuhakwatela mo ovamati meyambulepo laAfrica.
Nandi-Ndaitwah okwa ti omwaka wakula, nomwaalu wounona voumati uhapu ou li konima nopeemhito dihapu ngaashi meengeleka nomeengudu dopamifyuululwakalo ove dulike kovakainhu.
Okwa li ta popi koshoongalele shoSwapo shomapopifafano koSangwali koshitopolwahoololo shaZambezi mOshoondaxa.
Omapopyo aye okwa landula eenghundafana doshivilo shoPan-African Women’s Day naashi ehangano e li ledina Pan-African Women’s Organisation (Pawo) la wanifa omido 62, oko a li omupopi, mOvenduka Olomakaya.
Efiku eli okwa li la dimbulukiwa koshi yoshipalanyole, ‘Invest in Education: Securing the Future of Women and Girls in Africa’.
“Ongovakainhu, otwa limbililwa kombinga yonakwiiwa yenenedu letu notwa itavela mokutala movanyasha, unene ngaa movamati. Ovamati paife otava shaala po notu shi udite,” Nandi-Ndaitwah osho a ti ngaho.
Okwa weda po kutya omunhu ita dulu okuyambula po oshilongo nongudu ashike imwe yovakwashiwana.
Nandi-Ndaitwah okwa ti, oinima ya pamba ehongo okwa li ya kundafanwa koshivilo.
“Ongovakainhu Ovafrika, otu na nounona vetu, ehongo ndee okwa li unene twa tala kovanyasha,” Osho a ti ngaho.
EFIKU LOVAKAINHU VAAFRIKA
Oshivilo shefiku lovakainhu vaAfrika noshitufidalo shaPawo okwa li sha popya osho shi na okuningwa po mokuyambula po ovakainhu muAfrika alishe.
Omukanda woikundaneki oo wa dja koPawo Omaandaxa, owa ti oinima ei otai lalakanene okulundulula onghalo yovakainhu noukadona menenedu alishe nokukandula po omaupyakadi oo e li po paife.
Etokolo limwe otali pula okutota po oveta youfemba wovakainhu, tali pula oilyo yoAfrican Union opo i shaine nokutula moilonga oinima ya fimana, mwa kwatelwa oMaputo Protocol koufemba wovakainhu, Beijing Platform for Action nosho yo African Youth Charter.
Oshoongalele natango okwa li sha pula kutalwe kovanhu aveshe.
“Osha fimana okutala keemumbwe doukadona novamati moinima ya pamba ehongo nosho yo onghalafano. Oshinima eshi shokutala keembinga adishe otashi kwatele po efikopamwe lopaukakwashikekookanhu okudja peedula dopetameko notashi eta omukalo u fike pamwe kelihongo lopetameko,” Paavo osho a ti ngaho.
Oshoongalele natango okwa li sha tala kokulundulula omikalo dehongo nosho yo komumbwe yelunduluko lehongo liwa noli li wetikile.
“Eshi osha kwatela mo okutalulula omilandu, eeveta nomufindahongo kukwashilipalekwe kutya odi na oshilonga noda pumbiwa mokushakeneka eyambulepo leemumbwe daAfrica.
Ehongo nali longekidwe pamukalo oo tau nghonopaleke oshiwana shokomongula nokuyambidida eyopombada leliko lenenedu, omanga taku talwa kokuweda ko ongushu nokuyandja eemhito doilonga,” Paavo osho a ti ngaho.
Omatokolo amwe a wedwa po a ningwa omwa kwatelwa okutula oshimaliwa momatungo ehongo, okulwifa omahepeko opaukakwashikekookanhu noinima ya nyika oshiponga, okutula omwaalu wovakainhu pombada momalutu okuninga omatokolo, okunghonopeka ovanyasha vovakainhu nosho yo okuxwaxwameka eliko le lifikamena po.
Omatokolo natango okwa li a tala kombili nokeameno lovakainhu, okutula oshimaliwa moinima younongononi, oungoba, ouindjinia nosho yo omwaalu mehongo, omahongo oshiwana kombinga youfemba neameno, nokutwala pombada ouleli neenghono moPawo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
