Ina mu tila kombinga yEpangelo Mining, kotheni ashike nawa

OMINISTA Yiipindi Noofabulika oya kwashilipaleke aapunguli moshikondo shoomina yaa kale ina yaa mbandama kethaneko lyoku gandja uuthemba wiikwamina ya simana momake gehangano lyepangelo Epangelo Mining Company.

Hage Geingob okwa gandja ekwashilipaleko ndika kaapunguli mbaka poshigongi shoongeshefa moLondon oshiwike sha yi a ti mbaka na ya kothe ashike nawa ngele oye na nale oombapila dhawo okukonga iikwamina moNamibia oshoka ndhoka ita ye dhi kuthwa nando.Geingob okwa tomona ndhika pethimbo lyolusitati mpoka pwa li aanangeshefa aaNamibia naamboka yo UK moLondon oshiwike shayi, a ti oshilongo shomapenda oha shi wilikwa kekotampango nokompango.Geingob okwa li ta yamukula kepulo lyomupevi peresidende gwehangano lina oombelewa dhalyo moLondon lyedhina EnerGulfResources, Yves Neuville ngoka a li hala okuuva ngele etokolo lyaholomende ndika oku lundulula ooveta dhokumina ita li ka ehameka oshikondo shoomina? Geingob okwe mu yamukula a ti oshilongo oshiyamba ndele aantu yasho oohepele. Omolwashika opwa pumbwa oku lundululwa ooveta opo aakwashigwana ya kale nokulya iiyimati tayi zi moonzo dhuushitwe woshilongo shawo, sho yo taya longo iihambulwa moonzo ndhoka. Geingob okwa pula Neuville kutya ngele ye oku na oshilongo oshiyamba ndele aakalimo yasho oya hepa ota ningi ngiini?Okwa ti omulandu nguka ota gu gandja uuwanawa kaapunguli noshowo kaakwashigwana okuza moonzo dhuushitwe woshilongo shawo. Okwa kwashilipaleke aapunguli kutya elalakano lyomulandu nguka olyo onkambadhala oku tala kutya ayehe oya mona uuwanawa moonzo ndhika dhopaushitwe. Okwa ti Namibia okuume kaapunguli na ota kala nonkalo ngaandjoka opo aapunguli ya kale yena einekelo muye ethimbo alihe. Minista Yoomina Niikwankondo, Isak Katali okwa tseyithile omwedhi gwa yi kutya ooveta dhokumina otadhi ka lundululwa opo Epangelo Mining Company li kale nuuthemba oku konga nokumina iifulwa mevi yasimana.