Iizemo yongundu 12 ometitano

IIZEMO yekonakono lyongundu 12 ndyoka hali ithanwa Namibian Senior Secondary Certificate[NSSC] ordinary, ota yi ka gandjwa oshilongo ashihe metitano lyoshiwike shika.

Omuwiliki gwomakonakono nokukonakona, mUuministeli Welongo, omundohotola , Cowley van der Merwe okwa lombwele oNampa kutya iizemo yekonakono lyo NSSC ota yi kala ya pita potundi 08h00 yongula yetitano.Okwa ti aalongwa ota ya vulu oku ka tala iizemo yawo pomahala mpoka ya li ya nyolele omakonakono. Sho a pulwa ngele iizemo ota yi ka nyanyangidhwa miikundaneki, Van der Merwe okwa ti, sigo oompaka kapena oshikundaneki sha ulike shi na ehalo oku nyanyangidha iizemo mbika, pethimbo shika sha tseyithwa.Iizemo yekonakono lyongundu 12 ondondo yopombanda oya li ya tseyithwa nale muDesemba 2009.Mbika oya li ye endele pamwe niizemo yekonakono lyongundu 10, nenge ekonakono lyonzapo yuulongelwe wo junior.