Hamushangandjai muku woSwapo nokwa li ominista ikulu yoikwameni Pendukeni Iivula-Ithana okwa ti ovamati ove li konima ngee tashi ya kokumona eemhito domauwa mahapu molwokuhena oxee.
Eshi otashi ningwa shaashi ovalumenhu vamwe ove na ounona ashike ihave va file oshisho, osho a weda po ngaho.
“Nande nee ovanhu ova tala unene kwaavo ve li moshiwana ovo kwa li kuwetike kutya otava mono oixuna noitava filwa oshisho, eshi kwa li va tala unene kovanhu voludi olo, ovanhu voukakwashikekookanhu umwe okwa li inava talwa vali nawa.”
Iivula eshi okwe shi popya ta nyamukula komapopyo omuwiliki wongudu yoLandless People’s Movement (LPM) Bernadus Swartbooi mopaliamente Etitatu loshivike sha dja ko.
Swartbooi okwa ti ovakainhu otava pewa unene omauwa ehe li pauyuki momalelo okupitila moshinima eshi shefikopamwe sha landulwa keengudu dihapu dopolitika moshilongo.
Swartbooi okwa ti shinima eshi shefikopamwe loukakwashikekookanhu ola kuma nai ovamati novalumenhu.
“Onghalamwenyo yokanona okamati paife otai limbililike. Ngee owa tale nawa keeveta edi twa pitifa meumbo omu, nomushamane otaku tiwa okwa kwata ongonga koshiwana nande ina monika ondjo nale,” Osho a ti ngaho.
Okwa ti ovalumenhu ovakala va kwatwa komilungu nomaufemba avo okwa tulwa pedu opo kuhangwe efikopamwe.
“Osha ninga sha nyika oshiponga ndee oshinima osho twa pumbwa okutala nawa, opo oshinima shipe shefikopamwe shiha ete omikalo dimwe da yooloka dokuhafikapamwe nokweeta omahepeko opaukakwashikekookanhu a ye komesho,” Osho a ti ngaho.
Iivula-Ithana okwa ti okutekula ounona luhapu okwa ninga oshinakuwanifa shooina nooinakulu.
“Kapu na vali ootate va file oshisho ounona voumati ndee tave va tekulile okukala ovalumenhu,” Osho a ti ngaho.
Omunandjungu woufemba womunhu Ndiilo Nthengwe okwa ti omadilaadilo aSwartbooi kombinga yoshinima eshi shefikopamwe loukakwashikekookanhu okwa ekelashi oshinima eshi tashi lalakanenwa shi kufwe po shokutya ootate ovo ashike hava lele moshiwana.
“Omanga a henuka omalunduluko oo a ningwa paife mokatendo kokukelela omakwatongonga nosho yo okatendo oko taka kelele omahepeko opaukakwashikekookanhu, oshiholelwa, yee okwa kala oshilyo shopaliamente oo kwa li a pumbwa okukundafana nokukufa ombinga moinima ya pamba nghee omalelo haa longo moshiwana she likolelela koukakwashikekookanhu woye,” Nthengwe osho a ti ngaho.
Nthengwe okwa popya kutya oupyakadi kau shi ovalumenhu, ovashamane ile ovamati ashike elongifo ashike leenghono koonono.
“Oupyakadi okukala ashike u wete oove to ti, okushitula moilonga, okutambula ko kutya ovanhu vamwe ove na eenghono ve dule vakwao osho hashi eta omaitavelo kutya ovalumenhu ovo ashike va pumbwa okulela.”
Omukulunhuwiliki wehangano ledina Regain Trust James Ithana okwa ti osha yela kutya Swartbooi oku na eudeko lishona kombinga youkakwashikekookanhu ile kutya oshinima shefikopamwe loukakwashikekookanhu otashi lalakanene shike lela.
Okwa ti eeveta doimbuluma youkakwashikekookanhu oya tambula ko kutya ovalumenhu novamati ovo oihakanwa ihapu.
Omundjadjukununi woikwapolitika Rakkel Andreas okwa ti efikopamwe loukakwashikekookanhu oli na oinima oyo ya kala inai talika ko nawa oule weedula, okutameka ashike noufemba wokuhoolola, oufemba wokulonga neendjambi di fike pamwe, oufemba wokumona ehongo nosho yo okukufa ombinga mopolitika nokuninga omatokolo okutumbula po ashike imwe.
“Okutya oinima ei otai ti ovamati paife ova kupulwashi omukalo wokushunifa monima oilonga ya fimana oyo ya tulwa mokutula ovakainhu pondodo mounyuni,” Osho a ti ngaho. Andreas okwa ti okuhe na eudeko otaku monikifa omapopyo aSwartbooi a kale a nyika okushunifa monima.
“Oilyo oi lile po okuninga osho oshiwana sha pumbwa ndee mutu okwa li a pumbwa okupopya osho sha pumbwa okuningwa po kombinga yovamati kombinga youpyakadi ou u li poshitaafula, ndee haku shi kwatela kumwe nokupopila efikopamwe loukakwashikekookanhu kutya olo tali eta oupyakadi ou,” Andres osho a weda po ngaho.
Omutoti weeveta wongudu yoPopular Democratic Movement Inna Hengari okwa ti efimano leenghundafana tadi lalakanene okweeta ovakainhu novanyasha poshitaafula shokuninga omatokolo itali kufwa ko papuko.
“Pandjokonona, ovakainhu kakwa li va talika kutya otava dulu okukala omutumba koshi yomuti pamwe novalumenhu, oko eenghundafana da fimana tadi ningilwa,” Hengari osho a ti ngaho.
Hengari okwa ti, efimano lefikopamwe momalelo nali talululwe.
“Itatu twikile ashike nokuyandja oungobe moukololo nokushakeneka omisholondodo medina lomauwa ovamati. Osha fimana kufye atushe tu kondjele efikopamwe.”
Omundjadjukununi woikwapolitika Rui Tyitende okwa ti ovakainhu kakwa li lela ve udite va tambulwa ko shaashi ovakainhu vahapu okwa li va hala okudilaadila nokuliumbata va fa ovalumenhu meenhele omo kwa li nale inava tambulwa ko.
Okwa twikila ndee ta ti ovakainhu onghee ngaa tava twikile okuningilwa omahepeko nosho yo oinima ikwao ya nyika omafindilo kongudi.
“Oshiholelwa, omuleli woshilongo omukainhu natango na talike ko ngaa a nghonopalekwa ngee natango ota twikile ashike nokumonifwa oixuna palutu nopamwenyo keumbo? Ota dulu ngaa okunwefa mo etulomoilonga leeveta odo tadi ungaunga nomahepeko opaukakwashikekookanhu?”
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
