Iiveva otayi yono po oshigwana: Nujoma ta ti

OMUKOKOLIPRESIDENDE Omundohotola Sam Shafiishuna Nujoma, ngoka wo e li
he yoshigwana sha Namibia mOlyomakaya ngaka ga zi ko okwa popitha engathithi enenenene lyAakwaSwapo moshigongi shoka shOswapo sha ningilwa mehalandjandja enene lyOombelewa dhElelo lya Helao Nafidi popepi nOhangwena mOshitopolwa sha Hangwena, moka a ganeke omunwe Ookalyamupombo mboka haya kwata oomeme nuunona wuukadhona koonkondo noshowo okuyaka po iinima yaantu, okuyuga aantu iinima yawo nokuteya oondunda dhaanangeshefa nosho tuu kwahomatiwa.

‘Aawiliki yOswapo otu neni omashongo omanene gaanona yaamati taya kwata oomeme naanona koonkondo nokuyaka po iinima yaantu, unene yaanangeshefa kwahomatiwa nokuyuga wo aantu koohandimwe kwahomatiwa. Taya nyangula oomeme uundjato wawo noku ya ningila omatilitho. Oshinima shoka shi tuleni po sho. Sho twa kala oondjato dhoomeme ohadhi kwatwa? Omwe shi kutha peni, shoondjato dhoomeme tadhi kwatwa nokuunona uushona wiininga ookawalala. Shi tuleni po sho. Oshili otamu shi mono. Otatu mu pe kapenya.
Ngele onda uvu omuntu wa kutha meme iinima ye, nenge wa kwata meme nenge okanona koonkondo nowa yuga omuntu wa homata, oshili oto shi mono. Otatu ku pe kapenya,’Nujoma ta tumbula ngawo nokuulika omunwe gwe gwomuuliko mombanda, ta gana ta ti oshili Epangelo itali kiidhidhimikila we aantu yatya ngawo taya yono ombili yoshigwana.
Ookalyamupombo ta kamitheni. Esiku ngaa Kalunga ta zi po pu ne ndele Satana te ya po, tamu ke shi mona ngaa. oshili sho.’ Nujoma ta ponokele wo mOongeleka dhIiveva moka nadho ta ti otadhi yono po oshilongo nokupukitha oshigwana. ‘Tse otwa kala tu na Oongeleka dhetu oonene nodhoshili moNamibia muka ngashi ELCIN, yEvaengeli yokUushimba, ya Anglicana noshowo ya Roman Katoolika ka Roma, nosho tuu ndhoka dha kondja pamwe nOswapo omolu emanguluko lyoshilongo shika.
‘Oongeleka ndhoka dhiifundja, dhOuniversal aniwa nosho tuu, sho twa kala tatu lu muka, dho odhi li peni? Otadhi tu lombwele shike. Tse hela twa kala otwa kala tu shi Kalunga koshili, ngu ta lokitha omvula. Tse katu shi Kalunga ka Israeli, mba sigo okonena ndjika taya uhala taya dhipaga Aaraba. Oyo nee ye na Kalunga mboka, yo taya uhala taya dhipaga aantu? Omukokolipresidende ta ti ngawo nokupula. Ta ti wo kutya oshinima shomalufuko gopamuthigululwakalo ngoka ga kuthwa po kaatiligane yAatumwa, nashi shune po.
‘Otwa hala oohango dhetu dhoshiluudhe dhi shune po. Aaona yetu yaakadhona naya fukale ngashi sha kala nale ndele konima yolufuko, taya shuna kOosikola ye kiilonge ngashi shi na okukala. Omithigululwakalo dhetu nadhi dhigininwe. Omalaka getu goshivalelwa mo naga dhigininwe. Naga kale ogo gotango. Oshiingilisa otatu shi popi ashike molwashoka twa hala okukwatathana nuuyuni, ashike inatu dhineni omalaka getweni ongaavalelwamo. Haku simaneka aazaaizai nomalaka gawo. Otatu ya simaneke ashike ngele nayo otaye tu simaneke.
Ngele hasho walye oholo momitse dhawo moka,’ Nujoma ta popi. Omukokolipresidende, ngoka wo a popi kombinga yEsiku lya Afrika nkene lya totwa po, okwa indila koshigwana sha Namibia shi pandule noonkondo Epangelo lya Angola molwashoka olya kwathela tagu pu mo Aanamibia sho ya kala taya kondjele emanguluko lyoshilongo shawo, unene tuu sho ya kala mo Angola moka nokukala taya kondjitha omukolonyeki South Africa sigo taye mu dhenge nawa pakwathelo lyEpangelo lya Angola mewiliko lyEpenda Omupresidende Augustino Neto nokonima Omupresidende Eduardo do Santos nEpangelo lya Cuba.
Ta indile koshigwana sha Namibia shaa hinde nande Aangola, ihe ya kale nayo nombili nomuukumwewumwe. ‘Ngoka to dhenge Aangola, nena Onamibia nenge Aanamibia wa dhenga. Omundohotola Nujoma ta ti ngawo nokugwedha pokutya Namibia okwa manguluka na ita shuna we muukoloni, naangonga nenge mboka taya ka nyenga epandela lya Namibia, ya hala oku li kulula ko noku li kutha ko hoka lya tsilikwa, naya takamithe , otaya ka pewa kapenya nokufumvikwa nomwenyo.
Omukokolipresidende ta gwedha po ta ti, omahogololo ngele tage ya pehulilo lyomvula ndjika, oshigwana nashi ka hogolole oSwapo ya Namibia oshoka oyo ashike ongundu ndjoka tayi vulu okukaleka po ombili, engungumano neuvathano mokati koshigwana sha Namibia nokutula po wo ehumokomeho lyopamona nolyonkalonawa yoshigwana.Ta indile oshigwana shi tsikile neiyambo miilonga yoshilongo ngashi sha kala tashi iyamba miilonga yolutenda, ndoka lu li nale pokuthika mOshikango. Ta ti oshigwana nashi ilonge, opo shi vule okushita iinima okuza moonzo dhoshilongo, ndhoka pethimbo ndika tadhi dhanenwa kaatiligane yaazaizai.
Taya pata oomina dhoshilongo, omanga Omaipelia taga yono iimaliwa yomuuyuni. ‘Aanona, aanasikola naya longwe omuyalu, moosikola, hainima mbi kayi na oshilonga ngashi Oombiimbeli nosho tuu. Mbyoka nayi ethiwe manga,’ Nujoma ta popi.
Ta ti naamboka aakuluntu nayi ilonge, ngashi ye i ilonga, ndele taya ka longa mo nawa iikwamina yawo nokushita iinima.
Ta ti ngashi Uranium, otayi vulu okulongwa mo nawa ndele taku ningwa nayo olusheno olundji lela, lwa gwana nawa. mOshigongi omo tuu moka,
Omukokolipresidende okwa gandja uukalata wOswapo kaantu ye li yahamano mboka, ngashi a ti, ya zi mo RDP nokuya ya ndjoine oSwapo ya Namibia. Ta ti oya ninga nawa sho ye ya kongundu yoshili yoSwapo ndjoka yi li ongundu yoshigwana sha Namibia.
Oshigongi osha li sha kalwa kOoministeli, kOogavena, kOokaansela dhIitopolwa nodhoondoolopa, kaawiliki yoSwapo okuza kIitopolwa yi ili noyi ili, kAaleli yOpamuthigululwakalo noyOpambepo, kaanangeshefa, kaanafaalama, kaanyasha noshowo kaawiliki yi ili noyi ili yoshigwana.