Iipotha mbyoka ya ningilwa Hailulu ya ekelwahi

IIPOTHA iyihe mbyoka ya li ya ningilwa Omukuluntuwiliki gwehangano etungimagumbo lya National Hosuing Enteprises (NHE), Vincent Hailulu, oya ekelwahi mEtitano sho Ompangu yOpombanda ya gandja elombwelo kutya nayi ekelwehi.

Iipotha mboka Hailulu okwa li e yi ningilwa kOkomisi yi na sha nekondjitho lyiilonga yOkoraputo/Anti Corruption Commission (ACC).
Shika osha landula wo Hailulu a sindana mOmpangu mOmpangu yopOmbanda, moka a li ta kondjithwa ku ACC nokehangano lyomahangano gaaniilonga mu Namibia/National Union of Namibian Workers (NUNW),sho Omupanguli gwopakathimbo Johan Swanepool a gandja eindilo kutya iipotha mbyoka a ningilwa mu Novemba,nayi talululwe.
Omwedhi gwa zi ko, Hailulu okwa li a lombwele Ompangu kutya iipotha mbyoka a ningilwa kayi shi yoshili na oya li ashike onkambadhala ya NUNW naantu yamwe ya li nale haya longo mOkampni (kaye wete shoka taya ningi), ye mu kanithile iilonga ye.
Okwa ti aantu mbaka oya hala a ze mo mOkampani opo ya shune miilonga.
Hailulu okwa li wo a shuninwe oshimaliwa she shombooloha yOondola/N$30 000 shoka a li a futu momasiku 27 ga Novemba 2008.
ACC okwa li a kwata po Hailulu konima sho kwa ningwa omakonakono ga kwata uule womvula, sho pwa holoka omapoipyo okwa longo iilonga yokoraputo mOkampani ndjika.
ACC okwa li a popi kutya mu Febuluali 2007, Hailulu okwa li aniwa a gandja opoosa yOkuungaunga nOmikulu mu NHE, ihe okangundu hoka ka li ka ningi omapulapulo gaantu mboka ya li ya hala opoosa ndjika oka li ka ulike omuntu gulwe kutya oye e shi enditha nawa.
Natango momasiku 19 ga Maalitsa 2007, Hailulu okwa li aniwa yela omuniilonga gumwe pamukalo inagu uka nogwokoraputo. ACC okwa li wo ningile Hailulu oshipotha shelongitho lyoshimaliwa sha mofamili ye nokuye mwene iikando iyali momumvo 2006.
Mu shimwe shomiikando mbika, Haulilu okwa li aniwa longitha okakreditakarta kOkampani mokulanda iinima ye mOshitola ya Pick ‘n Pay.