Iiningwanima itano yuuvu woHIN1ya kolekwa

IININGWANIMA itano yomukithi gwekunku lyoH1N1 oya kolekwa metine lya ziko moshilongo, naa shika osha londeke omwaalu gwaantu mboka ya ehama uuvu mbuka 57 sigo oompaka.

Yatatu yomaavu mboka ya monika uuvu mbuka oyo moVenduka.Oyo omumati gwomimvo 17 omulumentu gwomimvo 25 nomukiintu gwoomvula 24.Iiningwanima ikwawo iyali oyo omulumentu gwoomvula 20 gokOtjiwarongo nomukiintu gwomimvo 23 gwokOshakati.Sigo oompaka iiningwanima ayihe kumwe 298 oya konakonwa, omanga omayamukulo gomakonakono giiningwanima 40 natango ga tegelelwa.Gladys Kamboo omupopiliko gUuministeli wUukalinawa okwa koleke kutya aavu ayehe yatano oye li nawa.Sigo oompaka omuntu ashike gumwe oye a sa shi na sha nuuvu wekunku lyoH1N1 moshilongo, Omanga muuyuni auhe pamishangwa dhe hangano lyUukalinawa Muuyuni WHO aantu 277 607 okwa kolekwa ya li ye ehama uuvu mbuka pamakonakono gopalabora, aavu 3 205 oya si omolwa ekunku ndika lyoH1N1.Ndele Ehangano lyUukalinawa mUuyuni olya ti molwaasho iilongo ina yi tegelelwa we, yi ninge omakonakono noshowo oku gandja omayamukulo komuvu nomuvu omwaalu gwogwene gwene gwaavu ayehe otashi vulika gu kale pombanda okuyeleka naangoka gwa gandjwa pambelewa.Ehangano lyAmerika lyoku pangela noshowo okukeelela omavu(Centre for Disease Control and Prevention) olya gandja omushangwahokololo ta gu ti sho kwa ningwa ekonakono lyomuule lyaa mboka 36 ya si kuuvu mbuka mokati kaanona ye li kohi yomimvo 18, okwa monika kutya oopelesenda 67 dhaanona ota ku tiwa odhi li moshiponga shi na nuunamiti, nota shi vulika ya kwatwe kepiyagano li na sha noonerve dhawo.Ota ku tiwa aanona 10 yomo 23 mboka ya konakonwa oya monika woo ya kwatwa kobakiteli dha gwedhwa po kakele ko ku kala ye na ovirusa yoH1N1.Omandhindhiliko gekunku lyo H1N1 ogo olwiidhi, omukolo, omuligu tagu ehama, omanino, nenge omayulu ga thita, olutu ta lu ehama, omutse tagu ehama, uutalala, omvulwe, oshimela nonkungo omathimbo gamwe.