Iiningwanima ishewe iyali yekunku lyo H1N1

IININGWANIMA iyali yekunku lyo H1N1 oya kolekwa moshilongo, shika osha eta sigo opo mwaalu gwiiningwanima 62 mbyoka ya konakonwa no ya kolekwa palaboratorium.

Aantu mboka ya monikwa kutya oya li ta ya alukwa oyo omunona gwomvula yimwe gwo moVenduka nomumati gwoko Shomeya.Oyendji yaamboka ya li ya monikwa uuvu mbuka ngashingeyi oye li nawa, nomuntu ashike gumwe kwa tseyithwa a si mekwatathano nuuvu mbuka pOshikango.Omakonakono goosampula 363 oga li ga ningwa kehangano lyaNational Institute of Communicable Disease mo South Africa.Mwaandhika oosampula 267 ina dhi monikwa uuvu wekunku lyo H1N1, omanga ne dhomoosampula odha ekelwahi, na 12 odha kanithwa kehangano ndika, 18 adhike odho omayamukulo gadho ga tegelelwa sigo oompaka.Pamushangwa gwalyo gwongashingeyi, Ehangano lyUundjolowele mUuyuni WHO olya ti sigo oompaka iiningwanima 296 471 yekunku lyo H1N1 oya kolekwa koolaboratorium omanga konyala aantu 3 486 oya si omolwa omukithi nguka muuyuni auhe.Omandhindhiliko guuvu mbuka oga kwatelamo epupyalo nenge olwiidhi luupyu woonkatu 38 moshiyelekitho shaCelsius,omukolo, omuligu tagu ehama, omanino nenge omayulu ga thita, olutu ta lu ehama, omutse tagu ehama, uutalala nomvulwe. Omathimbo gamwe omuvu ota kungu ye oku na oshimela.