Iimbuluma mOshana tayi eta ko omutse

OPOLISI moshitopolwa sha Shana otayi ti kutya oyi uvite nayi unene kiimbuluma, mbyoka ya kala tayi yi pevi moshitopolwa shoka, yi li po ishewe tayi eta ko omitse noya indile koshigwana shi thikame po natango nokukondjitha iimbuluma mbika pamwe nayo.

Pethimbo ta popitha oshigongi shaatoolinkundana mOshakati mEtiyali lyoshiwike shayi, Chief Inspecta Karl Theron ngoka a keelela pehala lya Komanda gwOpolisi mOshana, Komufala gwOpolisi Ndahangwapo Kashihakumwa, ota ti kutya osha fa shi li ngeyi kutya iimbuluma mbyoka omathimbo ga zi ko, ya li tayi ningi mo iishona mOshana, oyi li po ishewe tayi tameke okuulukitha ko omitse dhayo. Okwa indile woo aahingi yiihauto taya hingi nayi notayi indile koshigwana shi hinge nawa. Chief Inspecta Theron ta ti momwedhi ashike nguka, Juli, mOshana omwa lopotwa nale iiponga yiihauto yi li 15 moka mwa sa omuntu gumwe noyendji ya ehamekwa, unene nokashona. Chief Inspecta Theron ta ti iiponga mbika ohayi holoka unene omolu okuhingilila kwaahingi, kokunwa unene, ano sha pitilila, kwaahingi yo taya ka hinga, okudhina oompango dhomoondjila ngashi unene okupitilila mpoka kwa ti omuntu ino pitilila, okuhinga kwaantu ye li mumwe nosho tuu okwaahasimaneka aahingi ooyakwawo.Iimbuluma yilwe tayi holoka mOshana ongashi omaidhipagomwene, ekwatonkonga noshowo eyugo kwahomatiwa nelongitho lyiingangamithi. Kombinga yokukwatwa koonkondo, Chief Inspecta Theron okwa ninga eindilo e li ukitha moomeme moka kutya inaya enda we oyo ayeke na inaya tokelelwa we pomahala giikunwa. Yo wo inaya nwa we unene nokukala ka ye shi mpoka ye li. Ta ti ita popi oomeme ayehe, ashike oyo ngaa mboka ha yi adha moonkalo dhatya ngawo. Shi na sha nomaimangeleko, ano okwiikutha oomwenyo mwene, Chief Inspecta Theron okwa ti ota lombwele oshigwana kutya kehe ngoka wu na uudhigu wu vule oonkondo dhoye, inda wu ka konge ekwatho kaawiliki yoye yopashigwana ngashi mboka yopamuthigululwakalo, yongeleka noshowo aahungimwenyo miipangelo mboka ye li popepi nangoye.Theron ta ti otashi eta omaipulo omanene oshoka oshigwana otashi imangeleke unene. Ta ti ngashi momwedhi nguka mOshana omwiimangeleka nale aantu yane lwaampoka. Chief Theron ta ti mboka hayi imangeleke, unene oyo ngaa mboka okuza poomvula 16 sigo 66.Chief Theron ota ti wo kutya mOshana omwa galukile mboka haya yeke kwa homatiwa noye li taya ungaunga nayo lela. Ashike okwa indila nee koshigwana shi ya kwathele mokuungaunga naaniimbuluma mbaka.