Iimaliwa yekwathelo lyuunamiti kaavu yepangelo

EPANGELO olya tula oodola oomiliona 10 pooha oku za omumvo ta gu ya opo li kwathele aavu mboka ha ya futilwa kepangelo uuna ya pumbwa uunamiti wopaulumompumbwe.

Okabinete okazimine edhikopo lyongunduwiliki ndjoka ta yi ka ungaunga noshinima shika,unene okushitalela komaindilo ngoka haga zi kaavu mboka ya pumbwa ekwatho meendelelo.Okabinete okazimine woo pudhikwe oshiketha shekwathelo kohi Yuuministeli Wuundjolowele opo shika, shikale noku konakona omaindilo gompumbwe yoshimaliwa okuza kaapangwa unene mboka ye na uuvu wa pumbwa epango enene lyo ihaa li vulika moshilongo.Omavu ngoka ta ga gandjelwa iimaliwa ongaashi uuvu womutima nomatando gomitima ngoka iha ga vulu okuningwa moNamibia noshowo galwe.Omatando omakwawo ongaashi ngoka gomepunda oku opaleka oonkandjambinzi ndhoka dha ninga nayi, oku tulamo ehuli nenge iitiyanathigo shoka hashi vulu ashike okuningwa kiipangelo ya South Africa.Okufikilwa molwa okankela unene kaavu mboka ye na ondjundo yuudhigu wu li kombanda yookilograma 90.Epangelo ota li ka futila woo aavu mboka ya pumbwa okukala monkalo yetonatelo enene konima sho ya zi metando enene.Uuyelele mbuka owa gandjwa wa pitile mUuministeli Wuuyelele nomakwatathano konima sho Okabinete ka li ka gongala mu 13 Kotoba 2009.Etokolo ndika olya ningwa unene sho omathimbonomathimbo epangelo lya taalelwa kaavu ya pumbwa ekwatho molwa omavu gapumba moshilongo muka, yo olundji aavu mbaka ka ye na iiyemo ya gwana opo ya futile uunamiti wawo.