Iimaliwa ya futwa ku NWR ndele aniwa iilonga ina yi longwa po

EHANGANO lyomahala gomatalelopo ga Namibia Wildlife Resorts[NWR] olya kanitha iimaliwa yoomiliona odhindji miifuta ya futwa omahangano ga pelwe iilonga ndele iilonga mbyoka ina ge yi longa aniwa.

Ota ku hokololwa kutya ehangano ndika ngashingeyi otali longo nuudhigu oku galulako iimaliwa mbyoka. Pauyelele wu li miikaha yoThe Namibian iimaliwa mbika oya li ya futwa pokati komimvo 2008 nomayovi 2010. Mokati kaambika omuna omwaalu gwoodola oomiliona 40 dha futilwe molweyopaleko lyehala lyokuvululukilwa lya Ais-Ais muumbugantu wa Namibia. Omwaalu omukwawo ogoodola omiliona yimwe omolwa okuzaleka nawa ehala lyokufudhila lyOkaukuejo moshikunino shiinamwenyo shopashigwana Etosha. Iimaliwa iikwawo oodola oomiliona mbali ndhoka dha li dha nuninwa eopaleko lyokombitha ndjoka ya li ya hanagulwapo komulilo pehala lyomavululukilo lya Hardap, noshowo okwoopalekitha omboola yomeya poNamutoni mEtosha.Pamishangwa ehala lyomafudho lya Ais-Ais, olya li lina okwoopalekwa koodola oomiliona 18, ndele oku ya pehulilo iilonga mbyoka oya ka kotha oodola oomiliona 41.Omushangwahokololo gwa pelwe oshigongi shokomumvo sha kwaalukehe omwedhi gwa yi osha ti omakonakono ga ningwa oga ndhindhilike kutya miimaliwa mbyoka ya longithwa okwoopaleka po Ais-Ais, omwa kana oodola oomiliona 8,4. Iimaliwa mbyoka ota ku tiwa oya futwa sha pitilila omwaalu ngoka gwa li gwa thanekwa oku longithwa. Ehangano ota ku tiwa olya futu iimaliwa kombinga yiilonga ta yi tsikile nonando iilonga ka ya li ya longwa. Iipumbiwa yimwe mbyoka ya li yi na oku landwa oya tulwa momisholondondo dhi vule gumwe naashika aniwa osha fala mpoka kutya yimwe yomwaambyoka oya landwa lutatu, pamushangwahokololo ngoka. Omolwa ekanitho ndyoka, ombelewa yomu yaluli mambo gepangelo oyi ipyakidhila nekonakono lyomuule. Omanga Okommissi yokukeelela Uulingingilingi ota yi konakona woo oshinima shelongitho lyiimaliwa poHardap no Namutuni.Ekonakono ota li tala kiilonga yaali nawa mokugandja otendela yokwoopaleka okombitha poHardap. Ekwawo ota li tala egandjo lyotendela inaa li landula omilandu mokugandja iilonga okwoopaleka omboola poNamutuni.Omuwiliki gwopevi gwa ACC, Erna van der Merwe okwa ti sigo oompaka yo ita ya vulu okugwedhako sha kutya ekonakono olya ya sigo openi.