Iilyolongo yaSacu monkambadhala okuhupitha oompale

EHANGANO lyOompale Lyuumbugantu wAfrica(SACU) olya gongalele moSwaziland oshiwike sha yi opo li tale ngele ota li ihupitha.

Onkambadhala ndjika oya landula sho iilyolongo itatu yomehangano ndika lyiilyolongo itano ya shaina omayuvathano gopakathimbo gokulanditha na Europa ga tseyikwa Economic Partnership Agreement(EPA).Omuprofesora gwomahupilo menongelo enene lya Stellenbosch Rachel Jafta okwa ti onakuyiwa yehangano ndika lyoompale oyi li montalelo.’Ota ya ka kambadhala oku li yumudha okuli kaleka nomwenyo’ osho a ti, ta ulike kutya eshaino lyoEPA kiilongo sha Botswana, Lesotho na Swaziland, olya li li niwe ompinge nalyo kuSouth Afrika. Lesotho na Swaziland, oyo iilongo iyali mbyoka omahupilo gayo ga thikama unene kiiyemo mbyoka hayi zi kehangano lyoompale lyuumbugantu waAfrica.Sha landula keshaino lye uvathano ndika, osha hala kutya South Africa ngashingeyi oku na ashike oku zimina nando ota ningilemo.Brendan Vickers gwenongelo lya Global Dialogue okwa ti euvathano ndika ota li gandja eshongo moshitopolwa shomayakulo nomapungulo.Iilongo mbika iyali oya gwililwapo komahangano gokugandja omayakulo noshowo omapungulo ga South Africa, ndele nee iilongo mbika oya hala okugandja oompito ku yalwe opo pu kale ekondjithathano ewanawa, no li na uukolele.Omuwiliki gwehangano lyo Trade Law Centre, Trudi Hartzenberg okwa ti oshiketha shoompale shika ita shi hulupo ando, ndele ita shi ti kutya ita shi vulu okuhulithwa po ngele ompito oye ya po.Shika ota shi ka ehameka Lesotho ngoka ha mono iiyemo yepangelo lye yoopelesenda 50 okuziilila koompale ndhika,omanga Swaziland oha mono oopelesenda 25 dhiiyemo yepangelo okuza moompale.Omanga South Africa ngoka ha gandja oopelesenda 0,9 dhiilongomwa ye yopashigwana koshiketha shoompale, ota ka mona uuwanawa petameko ngele ando ehangano ndika oli pate, ndele ita ka hala li pate omolwaashoka oshilanduli shepato lyalyo ota shi ka kala oshidhigu okuhumbata ku South Africa pankalathano nopamahupilo moshitopolwa.Nenge South Africa ota ka gandja iiyemo kiilyolongo yoSacu shampa mbika ta yi longithwa oku adha omalalakano gontumba, ngaashi tu tye elongo nenge oku humitha komeho oshikondo shuuhambudhi opo pu etwe iilonga oyindji miilongo mbyoka.Eshongo ndyoka enene lilipo olyo ndyoka kutya eshaino lyoEPA ota li nkundipaleke ompito ya Sacu opo a kale ena ashike omukalo gwo kufutitha iiyetwa mo gumwe aguke.Vickers okwa ndhindhilike kutya shi ka ota shi ka pula South Africa a kale nokukonenena uupitilo poongamba opo iiyetwa mo inaa yi longwa miilyongo yi etwe moSouth Africa.Shoka ha shi ithanwa elundululo lumwe lwoshilongomwa ota shi kala shi na oonkondo miilongo mbyoka ya shaina omauvathano go EPA, sha hala okutya oshinima ngaashi nando ohema ya landwa palwe oya pumbwa ashike oku tulwa oombandi miilongo mbyo opo yi talike ya longwa moka.South Africa oku na iipumbiwa ya kitakana ngele ta shi ya komalanditho noshowo kehumokomeho nelongelokumwe na Europa, ndyoka ta li pumbwa elundululo lwaali lyoshilongomwa, ngaashi okuyohoha okatunu ka ninge oongodhi ndhoka dhina okutungwa dhi ninge oshiyata opo ihe oshiyata ota shi ningwa ohema, elapi lyokombete nenge ombulukweya nosho tuu.Omauvathano ngaka ota ga eta mpoka opo pu kale pena ompito yo ku eta iilongomwa yi na ombiliha oku za koEuropa ta yi ya moSacu.South Africa oku na woo uupyakadhi nokatendo hoka taka pe Europe ondondo yokukala oye oshilongo sha gamiwa pamalanditho.Vickers ota ti shika ota shi ti ngele oshilongo osha uvathana niikwawo yimwe tu tye ngaashi mbyoka yehangano lya Mercusor, India, na China nena oshilongo oshi na aluhe oku shanga kutya Europa oye oshilongo shagamiwa kombinga yomahupilo.Shika oshi na uupyakadhi ku South Africa ngoka a hala okutunga po omakwatathano ga kola gopaipindi niilongo iikwawo yoketatangonga lyuuyuni wokuumbugantu, nenge elongelokumwe lyuumbugantu-uumbugantu.Hartzenberg okwa ti South Africa okwa hala oku kundathanuna euvathano lyoompale lya Sacu. Omanga Lesotho, na Swaziland mboka ya ikwatelela unene koompale ndhika, ndele shika iha shi kwathele sha South Africa pa iyemo.Xavier Carim omukwatelikomeho gwoonkundathana miipindi nomomahambulo okwa ti omauvathano gopa Epa ota ga nkundipaleke Sacu.Ngele ina shi endelelwapo iipumbiwa yimwe yaEPA ota yi ka nkundipeleka Sacu, kutya ngaaka ita ka vula we okulonga nawa ngaashi he shi ningi nena. Yimwe yomwaambika ongaashi iifuta yopoongamba kiiyetwamo, noshowo ompango yokutya oshinima nenge oshilongomwa osha za peni sho sha etwa moshilongo nenge sho ta ku tiwa osha longwa moshilongo shimwe shaSacu ongo oshiholelwa.Okwa ti Epa oku na iipumbiwa yimwe mbyoka ta yi ngambeke omilandu dhokutunga po uunamapya noshowo oshikondo shuuhambudhi, noku, tamununa omakwatathano gomapahupilo niilongo yilwe muuyuni kakele ka Europa.South Africa okwa ti ye ita shaina euvathano ndika omanga inaa mona kutya omautile ge oga monenwa omayamukulo.Namibia okwa kondekwa opo a shaine euvathano ndika, molwaashoka ngashingeyi oku na uuwanawa wopakathimbo moku landitha onyama yongombe koEuropa.Sacu okwa dhikwa po momumvo 1910.