Iilonga yOmpangu yOpombanda otayi tameke nena mOshakati

IILONGA yOmpangu yOpombanda ya Namibia otayi tameke ongula yonena nOmupangulipresidende gwOmpangu yopombanda ya Namibia Petrus Damaseb, okwa gandja elombwelo pambelewa ohela kutya iilonga yOmpangu yOpombanda ya Namibia otayi tameke ongula yonena.

mOshakati oshipopiwa she osha leshwa pehala lye kOmupanguli mOmpangu yOpombanda mOshakati omusamane Chris Liebenberg, moka, Omupangulipresidende Damaseb a popi oshindji sha longwa po kOmpangu ndjika yOpombanda molweendo lwomumvo gwa zi ko noshowo shoka shi na okuningwa po kumwe noompumbwe ndhoka dhi li po.Omupresidende gwEhangano lyOohahende Omuadvokate Danie. Small, naye okwa popi shoka sha etwa po kEhangano lyawo nkene lya totwa po, shoka tali lalakanene naashoka sha pumbiwa po, ano shi na okulongwa po natango. Ta ti etotepo lyEhangano lyawo oshinima sha simana noonkondo, oshoka oko haku yiwa kwaamboka kaye uvite ombili molweendo lwokukalekitha po Ooveta nOmalandulathano gadho.Oshiithanene shEsiku ndika lyEegululo lyIilonga yOmpangu yOpombanda moNamibia osha li sha kalwa kOmunashipundi gwElelo lyOshitopolwa sha Shana omusamane Loth Kuushomwa ngoka wo e li Kaansela gwOshikandjohogololo sha Shakatiuzilo. A li po wo a kalela po Gavena yoshitopolwa sha Shana omusamane Klemens Kashuupulwa ngoka ka li ta vulu okukala po omolwiinakugwanithwa yilwe pehala li ili. Kaansela Kuushomwa okwa li a ende pamwe na Meya gwOndoolopa ya Shakati tate Onesimus Shilunga, Meya gwa Ngwediva Jason Asino, Meya gwa Ndangwa Leonard Negonga noshowo nOmunambelewa Omukuluntupitithi mElelo lyOndoolopa ya Shakati tate Werner Iita, Chief Inspector Karl Theron, ngoka e li ngashiingeyi Omukeleli pehala lya Komanda gwOpolisi gwOpolisi mOshana Komufala Ndahangwapo Kashihakumwa, Komanda gwOsasiona yOpolisi mOshakati Chief, Inspecta Marcus Shivolo, Superitendende Omukuluntu gwOndholongo ya Luno tate Rooinasies, ngoka a li po pehala lyOmukulu gwOndholongo ndjoka ya Luno meme Cloete, Aapanguli mOompangu dhOomangestrata, ngashi tate Mika Namweya, meme Helena Ekandjo, tate Amutse, Simpson, Ndlovu, Haihambo na Mikiti noshowo nee Aanambelewa yOompangu yOpombanda mOshakati, mOompangu dhOomangestrata nosho tuu Aanambelewa mElelo lya Shana noyomOondoolopa mOshana nosho tuu. Konima yIipopiwa, Omupanguli Omukuluntu mOmpangu yopOmbanda mOshakati omusamane Liebenberg okwa hiyi ayehe koshuumbululwa mOombelewa dhOmpangu yOpombanda moka noya tyapula Oshituthiegululo shIiloonga yOmpangu yOpombanda ngeyi.