Iilonga yomatuko ga Air Namibia ta yi tuka oku ya koGhana

IILONGA yomatuko goondhila yaNamibia yedhina Air Namibia oya tseyitha ondjila ompe yomatuko okuya ko Accra sha Ghana.

Shika osheya konima ashike yiiwike yontumba sho iilonga yomatuko ndhila ngaka ya tseyithile kutya ota yi kala woo ta yi tuka okuya koLusaka oku pitila moJohannesburg.Omuwiliki gwomalanditho nomatseyitho gwa AirNamibia, Hellena Kapiya Nathinge okwa ti ehangano lye ota li longo noonkondo opo li andjaganeke omawawa galyo muAfrica.Okwa ti ota li longo shika noondunge ta li tala oompito ndhoka ta li vulu okulonga mekalelelo nokweeta po iiyemo.Kepulo kutya ngele oondjila ndhika ota dhi eta po sha mondjato yehangano lye, okwa yamukula kutya sigo oompaka ondjila yokuya ko Lusaka ta shi pitile moJohannesburg oya ulika nale ekoko ewanawa nehangano lyomalweendo goondhila gaNamibia ota li longo neitulemo opo li indjipaleke omwaalu gwaantu mboka taya vulu okulongitha omatukondhila ngaka.Okutuka meukililo okuya koAccra uule wootundi hamano, ota shi thigathanapo nomatukondhila gaSouth Africa ngoka sigo oompaka ogo ga li ageke haga tuka okuya koshilando shika oku za muumbugantu wAfrica.Air Namibia ngashingeyi ota kala oye ehangano lyomalweendo goondhila ha li tuka meukililo okuza ku Johannesburg okuya ko Accra sha Ghana.Omanga iilonga yomatukondhila ya SAA oha yi tuka oku za koJohannesburg ta yi pitile mo Lagos sha Nigeria okuya koAccra, nolweendo nduka oha lu kwata ootundi hetatu.Poshigongi shoonkundana etine lyayi, AirNamibia okwa ti ota kala ta ende ondjila ndjika lutano moshiwike, ta longitha euvathano ha li ithanwa fifth freedom traffic rights, ndyoka lya gandjwa komapangelo lya South Africa na Ghana.Euvathano ndika ota li gandja ompito kiilonga yomatuko yoshilongo shimwe, yi nambele moshilongo oshitiyali , ta yi londeke aantu noku tuka ta yi yi koshilongo oshititatu.Kepulo ngele Air Namibia ota longo opo a opaleke ompito yaantu ya vule okutuka nokuninga omalweendo gomombepo ombiliha ongo iilonga ye yokukoka, Kapiya Nathinge okwa ti shika ota shi ka ningwa momukalo ngoka ta gu vulu okutsikilwa na ota gu eta oshimaliwa.’Africa okwa pumbwa okukwatathana koondando dhi li nawa, nongele oondando ota dhi kala oombwanawa ndhika odhi na oku futila iilonga yomatuko ga longekidhwa.’ osho a ti.Okwa ti ondando yomatuko oya kwatelamo okuhehela noshowo okukaleka oondhila dhi li nawa, oofuto dhaaniilonga, oofuto dhomatuko, dha kwatelamo okufuta iilongo ayihe kombanda yaahoka oondhila hadhi tuka, ofuto yokunambela pokapale, iikulya, omahooli, okuthikama kwondhila pokapale noshowo iilonga yakulo pevi shina sha noondongelwa na yilwe oyindji.