Iilonga ya pingakanithwa niimaliwa yokwiilongitha

OMULELI gwongundu yo Rally for Democracy and Progress, omusamane Hidipo Hamutenya okwa ti ongundu ye ota yi ka eta elunduluko enene melongo ngele ando oyi hogololwe ongepangelo momahogololo gopehulilo lyomwedhi nguka.

Okwa ulike mpoka kutya aaleleli yongundu, ta yi pangele ka ye na einekelo momulandu gwawo gwelongo na ita ya vulu okulonga aantu yawo ,onkene oyi ipyakidhila noku enda enda ta ya hehela iimaliwa yokwiilongitha oyana.Sho a popitha oshigongi shongundu ye po Malinda, Hamutenya okwa tsomuthindo kelongo noshowo komulandu gwongashingeyi gwelongo.Okwa ulike kutya aapunguli moshilongo ina ya vula okumona aaniilonga ya pyokoka montseyo oshoka kamu na omalongekidho gokulonga aantu ontseyo yuungomba womaludhi ga yooloka.Shika ota shi nyengana molwaashoka omulandu, nomusinda gwelongo ogwa kulupa nogwa pumbwa okwoopalekwa.Hamutenya okwa uvaneke kutya ngele ongundu ye oya yi koshipundi nena yo ota yi ka opaleka omulandu nomusindalongo gwelongo lyoshilongo, pakugunkondopaleka.’Ota tu ka longa nokuputudha ongundu ompe yaalongi, ota tu ka nongeka nokunongekulula aalongi yoshilongo shetu’ Hamutenya ta ti.Ta gwedha ko ta ti epangelo kohi yongundu ye ota li ka landa omambo giilongwa ogendji, ta li tungu oondjugo dhomanongelo odhindji noshowo okwoopaleka ndhoka dhakulupa.Okwa ti ha pale unene sho aanuungomba yomoshitopolwa shaHardap ya ningi kaayena iilonga molwaashoka iilonga yawo yuungomba oya gandjwapo kaaChina mepingakanitho niimaliwa yokwiilongitha, aana yaanenentu.Okwa ti nongundu ye oshigwana osha tegelela okugalukila koondjodhi dhasho ndhoka dha kana uule woomvula omilongo mbali, Okwa uvaneke kutya ongundu ye ota yi kondjitha noku ngambeka uulingilingi mboka wa indjipala moshilongo, na ota yi ka longa opo yi ete po eyamukulo meshongo lya taalela oshimpungu shuundjolowele..Okwa indile nokukumika oshitopolwa sha Hardap shihogolole ongundu ye, yo ina ya pumbwa okutilithwa nenge okumbandamekwa.’Ino pumbwa ondjembo yo AK47 nenge ondjembo yilwe opo wu lundulule epangelo ndele owa pumbwa ashike opena opo wu shi ninge,’ osho a lombwele aayambidhidhi yongundu ye poshigongi.