Iilonga a tindi kutya okuna epya moshilelwahala shUkwangali

OMUPEVI minista mOshikondo shUunamapya, Peter Iilonga okwa ti ye keshi oshitopolwa shoohashike shalye yomepangelo mboka taku hokololwa ya pewa omahala gevi moshitopolwa shili kohi yelelo lyomukwaaniilwa gUkwangali, Sitentu Mpasi.

Omukwaniilwa nguka okwa holele uuyelele mboka pethimbo lyiihokolola mompangu petameko lyomwedhi nguka, kutya okwa gandjele omahala gevi kaanambelewa aanene mepangelo lya Namibia mwa kwatelwa nOmuperesidende Hifikepunye Pohamba. Omukwaniilwa okwa gandjele uyelele mbuka pethimbo lyiihokolola moka aanafaalama yomevi lyaayehe yeli 30 yokOshikoto nOhangwena taya kondjitha etidhomo lyawo moshitopolwa shoka komukwaniilwa Mpasi.Omukwaniilwa Mpasi pethimbo apulwa komugameni gwaanafaalama mbaka gwopaveta, okwa yamukulile kutya okwa gandja omahala kaawiliki mwa kwatelwa gavena gwaHangwena, Usko Nghaamwa, Ominista Yiilonga, Erkki Nghimtina, omuambasade gwa Namibia ko Russia , Ndali Kamati, Shapwa Kaukungwa, Peter Iilonga noshowo Ominista Yiikwagumbo, Rosalia Nghidinwa, ngoka eli omvalele yomUkwangali nomukalimo gwomoNkurenkuru. Ombelewa yOmuperesidende oya kolekele kutya Pohamba okwa pewa ehala konima sho a li eli indile. Iilonga mokwiikala oshinima shika oye omunambelewa omukuluntu gwaamboka ya tumbulwa ya pewa evi mOkavango ta ti ye kena mo ehala. Okwa ti ye natango oha litha iimuna ye mevi lyaayehe kOngandjera. Okwa ti okwa hala okuuva kumboka ya kundaneke kombinga yehala ndyoka opo ya konakone nawa kutya olina uunene wuthikepeni, na ishewe kutya olye heli longitha, nuunake ndika lya gandjelwe. Iilonga okwa ti ngele pamwe opuna omuntu gwontumba a indila ehala medhina lye, shika osha pumbiwa okupopiwa puuyelele. Nongele ndyoka olya gandjwa shili kuye medhina , nena ye okwa hala oku keli pulako, molwaashoka naye okwe li pumbwa na itapa kala sha shaali paveta ngele okwe shi ningi. Gavena gwa Hangwena okwa li a zimine kutya ye okwa pelwe ehala komukwaniilwa Mpasi.Ndele aanambelewa yalwe mboka ya tumbulwa aniwa ya pewa omahala komukwaniilwa Mpasi oya mwena inaya ikala shoka nenge yeshi zimine. Nghaamwa okwa zimine kutya okwa pewa omahala gaali gevi komukwaniilwa Mpasi, ye okwa zimine woo kutya okwa pe omukwaniilwa ngoka omagano molupe lwosheenditho shoonkondo hashi nana akuhe. Ndele okwa tindi kutya omagano ngoka ogo ofuto molwa oku pewa ehala ndyoka. Okwa tsikile a ulike kutya ye oha gandja na ota tsikile oku shininga uuna ena sha oku gandja.Ewiliko lyUkwangali kalili ashike momahokololo gokugandja evi kaanenentu ndele olya li woo tali lundilwa kutya olyeetha aantu ataya tula omahala omanene momalugumbo nando shoka otashi tsondumbo nomautho goveta yevi lyaayehe.Mu April nuumvo aanambelewa yopombanda mwakwatelwa, Ominista yOpevi yIipindi nOmipepo, Tjekero Tweya, Ominista yEgameno, Charles Namoloh, omukuluntu gwOpolisi, Sebastian Ndeitunga, nomuwiliki gwopolisi, moKavango Olavi Auanga oya li ya lundilwa ya tula omahala omanene moondhalate moshitopolwa shaayehe moKavango aniwa.Oveta yevi lyaayehe oyiindika oshinima shoka.