Iikundaneki oyi li konima kombinga yegameno lyuuntshitwe, Minista Nandi-Ndaitwah ta ti

IIKUNDANEKI mu Namibia oyi li konima noonkondo mokulopota kombinga yegameno yuuntshitwe na moshilongo omu na wo ompubwe yaatoolinkundana haya shanga kombinga yegameno lyuuntshitwe.

Shika osha li sha popiwa kOminista yOmudhingoloko nOmatalelopo, meme Netumbo Nandi-Ndaitwah, moshipopiwa she shoka sha li sha leshwa peha lye ku Amushanga omukuluntu mUuministeli mbuka, Omundohotola Kalumbi Shangula,poshigongiilonga shomasiku gaali shaanankundana mboka haya shanga kombinga yegameno lyuuntshitwe sha po Swakopmund oshiwike sha zi ko. Elalakano enene lyoshigongiilonga shika olya li okugandja uuyelele womuule kaanankundaana mbaka, kombinga yiikwamudhingoloko nosho wo okuya pa uunongo ya kale haya shanga iinyolwa yi li nawa, tayi uvitha ko oshigwana muule kombinga yesimano yegameno lyuuntshitwe.
Nand-Ndaitwah okwa ti oshinakugwanithwa shaatoolinkundana mbaka osho okugandja uuyelele koshigwana kombinga yomaupyakadhi ngoka ga taalela omidhingoloko pehala lyawo, moshitopolwas ha nomoshilongo ashihe.Okwa ti aanankundana mbaka oye na wo oshinakugwanithwa shokugandja iiyetwa po kutya aantu oye na okuninga ngiini, opo omaupyakadhi ngoka ga taalele omundhingoloko gwawo ge na okukwatwa moshipala.
‘Ondi itaala kutya mokugandja uuyelele koshigwana, aatoolinkundana otaya ka longa oshilonga sha simabna mokuuvitha aakwashigwa, ya katuke oonkatu okugameba omudhingoloko,’ Nandi-Ndaitwah ta pipo ngaaka.
Okwa ti mu Namibia omu na ashike aatoolinkundana aashona mboka haya shanga kombinga yegameno lyuuntshitwe na opu okuningwa sha opo onkalo yi lunduluke.