Iikombo iyali ya tindila kombanda yetungo

IIKOMBO iyali, taku tengenekwa kutya oya gumwe gwomaakalimo yomomikunda ndhoka dha dhingilila Oshakati, oyi li ya tindila kombanda yetungo lyEndiki lyOongeshefa dhEtango mOshakati, ano kayi shi kutya oya enda peni sho ya londa ko hoka noyi li nee tayi kembadhala ngeno yi nuke ko, ashike oya tila oshoka pevi opuule noonkondo.

Kutya pombanda mpoka oya yi po ngiini, oshikumithi, ashike otaku tengenekwa kutya oya londa po ya endela ngaa kootrapa hoka haku ende aantu sho taya yi komatungo gamwe ngoka ge li pombanda gaangoka ge li pevi. Etango mOshakati olya tungwa li ilonda lwaali nomuntu ngele oto yi koongeshefa nenge koombelewa ndhoka dhi li po fulula ontiyali, ou na okweenda kootrapa. Iikombo mbika iyali otaku tengenekwa kutya nayo oya tala nawa sho aantu taya londo nokweenda kOotrapa ndhoka ndele nayo wo tayi ningi ondunge yi ende ko yi ye pofulula yopombanda nayo wo yi
kiikandulile po oompumbwe dhayo, ngashi unene ndhoka dhiikulya, ano
okwiimonena omapeta gomalemune noshowo iikuliwa kuyo yilwe yi ili noyi
ili mbyoka hayi ekelwahi hoka kaalandi noshowo kooyene yOositola noombelewa nenge kaaniilonga kehala ndyoka.
Meme Nelly Dumeni ngoka ha longele mOmbelewa yOmundohotola Mugimu
pofulula yopombanda pomatungo gEtango mpoka, okwa ti kutya iikombo mbyoka oya ninga po omasiku gontumba nokuwete kutya oya nyengwa okuza ko molwashoka oya kana na kayi wete we kutya oya zilila peni sho ye ya ko kombanda hoka. ‘Ngashingeyi, okwatya ngaa yo ya hala okuza ko, yo ishewe ya hokwa okulya uushikependjewo mboka wu li ko hau ekelwahi kaalandi, kooyene yoositola noombelewa noshowo kaaniilonga hoka. ‘Ngeno okwa li opethimbo lyomeya gefundja, ngeno omuntu oto ti oye ya okuhondama omeya, ashike nee ngashiingeyi omuntu owu wete lela kutya oye ya okukonga iipalutha yayo,’ Dumeni ta ti ngawo nokugwedha po kutya aaniilonga mOositola nomOombelewa dhometungo lyEtango, ooyene yOongeshefa noombelewa noshowo nee Ookastoma ndhoka hadhi ya okulanda nokuyakulwa mOositola nomoombelewa mEtungo ndika lyEtango, ohaya kala ya kumwa ko kiikombo mbika ya londa pombanda. Aantu tayi ipula kutya iikombo mbika oye shi dhilaadhila ngiini, yi londe ko kombanda yetungo ndika ngeyi. Oyendji ota ye yi yolo nonkumwe onene lela, oshoka pokuma opuule noonkondo kokulondwa kiikombo ngaashi mbika ya londa ko ngeyi. Omuntu owa tila nee oku yi hinga ko, molwashoka oto vulu wu yi ngwangwaneke ndele tayi nuka ko nenge tayi gu ko ndele tayi teka nenge yi se nokuli, oshoka mpoka yi li opuule notashi vulika yi teke nenge yi se ngele oya gu ko.
Ooyene yomagumbo gomomikunda dha dhingilila Oshakati, pamwe opu na ngoka
wa kanitha iikombo yoye iyali mbika ngashi tayi monika methano ndika?
Ano inda wu ke yi londe ko kombanda yetungo lyEtango mOshakati. Yoyene
kombanda yetungo hoka nge oto tala nawa inayi sila ko ondjala, ashike otashi vulika ya sila ko enota molwashoka kaku na omeya.