OMUTEKULU gwomukokoliperesidende okwa holokele mohofa yaMengestrata gwa Venduka omaandaha ta tamanekelwa okuhinga akolwa.
Samiki Nujoma okwa kwatelwe moVenduka Olyomakaya konima aniwa sho a dhenge oshihauto she miitenda mondjila ya Hosea Kutako. Pahapu dhopolisi, Nujoma okwa hokolola a ti aniwa okwa pumwa kohauto yimwe okuza konima, ndjoka ya li ye mu landula tayi hingwa aniwa ku Simon Andjamba. Nguka okwa li emu landula okuza kondingosho yimwe koKatutura. Omolwa epumwo konima ndika kohauto ndjoka, Nujoma aniwa okwa kanitha epangelo lyohauto ye naandjika oyi idhenge miitenda komunkulo gwopate ndjoka ya Hosea Kutako. Konima yoshiponga, opolisi oya ti Nujoma aniwa okwe yi lombwele kutya okwa uuvu omitopo dhondjembo. Ndele pethimbo opolisi yeya poshiponga oya adhapo ashike Samiki Nujoma noshihauto she. Opolisi oya ti Nujoma aniwa okwa hokolola kutya okwa li a landulwa ku Andjamba okuza kondingosho mpoka puholike kwaangoka, ye aniwa okwa ziko, konima yokunyenyeta. Okwa thigipo aniwa ehala ndyoka oshoka kali a hala oontamanana dhi tsikile sigo otashi vulika dhi ninge olugodhi. Okwa li egululwamo sho iifutilemo oodola 4000. Oshipotha she osha undulilwa komasiku 14 ga Septemba.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
