Holomende ta ka talela yokutunga

IILONGA yomatungo ota yi ka ya mbala kohi yeho enene lya holomende opo pwaakale omutungi nenge ehangano lyokutunga ta li tungu lyaana ombapila yoku shininga. Ombapila yoludhi nduka ota yi kala noku ningululwa oomvula mbali kehe, ishewe ehangano kehe olina okufuta iifuta mbyoka ta yi kalekepo ewiliko lyo shikondo shomatungo.

Omahangano gaNamibia naangoka gopondje ta ga longele muka oge na okwiishangitha. Ngoka taga pogola otaga ka futithwa oodola omayovi 20 000 nenge oomvula mbali mondholongo nenge taga futu etaga edhililwa ishewe mondholongo.Minista yiilonga niiyenditho, Erkki Nghimtina okwa tula ontotwaveta yedhina Namibian Planning and Construction Council Bill poshitaafula moparliamende metiyali. Ontotwampango ndjika ota yi eta edhikopo lyolutu lwiilyo 13 nduka talu tsakanene lune momumvo ngele olushona.Olutu nduka ota lu nyolitha aantu ayehe noshowo omahangano ngoka haga longo moshikondo shomatungo. Eshangitho ndika ota li ningwa shii kwatelela komithika dha yooloka, dhomahangano. Ita pa ka pitikwa omuntu nenge ehangano lyokutunga li ishangithe kohi yompango ompe li longe sha ngele ina li futa uukwashilyo walyo wokomumvo kolutu nduka.Mboka ta ya indile opo yi ishangithe nolutu lwewiliko oye na okugandja uuyelele kombinga yiimaliwa mbyoka yena aaniilonga miitopolwa ya yooloka nuungomba wawo, iiyenditho mbyoka ehangano lina, noshowo iilongitho yilwe. Omahangano ngoka taga monikwa ondjo meihumbato nayi paithano nenge galongo miikondo yimwe kakele komatungo, mboka ya mwena okulonga nenge mboka ya hutuka[mbangolota] ota ya ka tendwamo membo lyomadhina, nopoompito dhimwe ota ya ka pulakenwa nokuvulikithwa.Nghimtina okwa ti moNamibia nopalwe muAfrica, iilonga yokutunga oyi li momake gaakwiilongo nomahangano gomeni lyoshilongo oga sindika notaga nana nuudhigu oku ya komeho. Shika okwa ti oshili oshoka omahangano ihaga mono eyambidhidho lya gwana tashi pitile mompango nenge tashi pitile mokupewa iilonga mbyoka yi li po..Nghimtina okwa ulike koNamibia ta ti uupyakadhi moshikondo shomatungo moNamibia owa kundanekwa olundji kiikundaneki , onkene osha pumbiwa pu ningwe sha opo omahangano gomatungo gomoshilongo ga gamenwe nokuhupithwa.Ontotwaveta ompe ota yi pe oministeli yiilonga niiyenditho oonkondo tashi pitile komayele taga zi kolutu lwomatungo opo a vule okukondolola eshangitho lyomahangano gokutunga omakwiilongo. Omahangano omakwiilongo oga tothwamo ongo ngoka gena iipambuliko yooperesenda 51 dhi li miikaha yaakwiilongo okuza pondje yoshilongo.Ehangano lyokutunga moshilongo olya talika ko eNamibia ngele iipambuliko yooperesenda 51 oyi li momake gaaNamibia yoyene. Oonkondo oonkwawo dholutu lwomatungo odho okukumika, okuhumitha komeho,nokugamena oshikondo shomatungo moshilongo, noshowo okukumika omapekaapeko, nokutulapo omithika dhopaungomba ndhoka dhina okulandulwa, noshowo nkene dhina okwiiyuthwa kudho. Olutu nduka otalu tula po omulandu gwokulanda pamuthika gwopaigwana.Ota lu longo woo pamwe na minista oku mu pa omayele kombinga yondando, nuuwanawa mboka tawu zi momakwatathano gopaigwana ngoka tashi vulika taga kala ga guma ependulepo lyiikwatungo nayilwe yokwoopaleka omuthika gwonkalamwenyo yoshigwana moNamibia.