Hogololeni inaa mu landula ondjokonona

OMULELI gwoRDP okwa pula aaNamibia ya hogolole ongundu ye shaashi oyo ayike ta yi eta elunduluko lyashili.Hidipo Hamutenya okwa ningi eindilo ndika pethimbo ta popitha oshigongi shotango shongundu ye pOshakati ehuliloshiwike lya yi.

Hamutenya okwa ti aawiliki yoSwapo oya kanitha ondjila yawo na ngashingeyi oyi itula ashike mokuhokolola opolitika yomonakuziwa.’Hogolola molwelunduluko’, hogolola mboka ya tala kokule,aaleli yi itula mo yoRDP mboka yi ilongekidha okukwatela komeho mombepo yombili, yelongelokumwe nookuume yopaigwana,’ Hamutenya tati.Okwa ti oRDP oya ulike ekalepo lyayo moshilongo ashihe noshowo pondje yoshilongo, no konima yomahogololo ga Novemba ekalepo lya yo ota li ka monikwa no ku uvika moshilongo kaantu oyendji.Okwa gwedha ko ta ti oSwapo oyi uvite uumbanda kombinga yoRDP ndjoka yi na omadhiladhilo omawanawa noshowo oondjodhi oombwanawa dhoshilongo, omanga oSwapo ka yi na nande ondunge yasha, Hamutenya okwa ulike ta ti ngele omukuluntu gwo Swapo omusamane Sam Nujoma pamipopyo dhe dhi na uumbanda niigwana yimwe unene Aingilisa naaAmerica, shika ota shi ulike uumbanda.’AaNamibia yakwetu, aantu mboka ta ku tiwa naya dhengwe noohamala kuSwapo,Aamerica, Aaingilisa naaNdowishi oyo ha ya pe Namibia omakwatho giimaliwa yoobiliona dhoodola odhindji.Iimaliwa mbika oha yi kwathele oshilongo shi hume komeho melongo, muukalinawa nomekalekepo lyoondjila. Hamutenya ta ti.’Ngele ou na epangelo li na omakwatathano niilongo ngaashi Amerika, Engeland, naNdowishi ndele oto ti ku hole aazaazai ou hole ashike aAngola, ku shi shoka to ningi, nowa kanitha ondjodhi yoye.,’ Hamutenya osho a gwedha po.Hamutenya okwa ti aaNamibia oyendji pamwe noodiplomate dhiilongo oya li ya kumwa komupopyo gwomuperesidende nale gwOswapo no gwaNamibia sho a tile aaEngilisa naya dhengwe noohammala komitse.’Namibia kena aaleleli aawanawa mepangelo ngashingeyi efano lya Namibia pondje ka li shi ewanawa.Otwa pumbwa oku lundulula manga inaa ku toka.Kombinga yoombumbo Hamutenya okwa ti oshilongo ota shi vulika shi bangolote ne humokomeho ota li hulu molwaashoka aaleli yoSwapo nepangelo lyawo ina ya hala okuninga sha kombinga yoombumbo.’Tala kuKapia ngoka ta fekelwa a ninga eyono edhigu li na sha nAvid, ndele Swapo ote mu galulile koparliamende. Ota shi sitha ohoni,’ okwa ti.Hamutenya okwa ti olutenda lwokuumbangalantu olwo ehepeko lyiimaliwa nomazigudhe, oshinima sha etwa po ku gumwe opo a nkondopeke eholokepo lye.Okwa ti ye na Nyamu oya li ya gandja omayele kutya olutenda ndoka ota lu ka kala iha lu longithwa ndele ina ya pulakenwa na oya tondika molwa omayele ngaka.Konima yoshigongi aanona yomekondjelo manguluko oya igidha nokuumba oohauto dho RDP nomamanya ndele opolisi oya ngungumaneke onkalo mbala.