Hogolola shaampoka wa adhika momahogololo ta ge ya

AAHOGOLOLI oyendji ka ye shi wo ngele ota ya hogolola miikandjohogololo yawo nenge otaya vulu okuhogolola apehe mpoka taya adhika, miitopolwa ayihe 13 yoshilongo.

Othe Namibia oya tseya kutya omuhogololi ota vulu okuhogolola miitopolwa 13 yoshilongo,momahogololo ngoka ta ge ya pehulilo lyomwedhi nguka.Omuhogololi inaa, pitikwa ashike, a hogololele mpoka ahala pethimbo lyomahogololo gopashitopolwa noshowo omahogololo gomiilando moka omuhogololi kehe ena okuhogololela poyaandjawo. Uuyelele mbuka owa gandjwa kondjandjokwatathano yOkomisi yomahogololo yaNamibia, OECN otayi ti omahogololo goshigongi shopashigwana nogopauperseidende omuhogololi ota hogolola shaampoka eli, oshoka oshilongo osha talika ko sha fa oshikandjohogololo shimwe ashike.Aaleshi oyendji oya pula Othe Namibian kombinga ya ngele omuhogololi ota vulu okuhogololela shaampoka.ECN oya endulula kutya mehogololo ndika omuhogololi ota hogololele mpoka eli esiku lyehogololo.Okomisi yomahogololo oya ti ishewe kutya uukalata womahogololo mboka wa gandjelwe momumvo 2002 owu na oonkondo sigo omomumvo 2012.Namibia oha ningi omaishangitho gaahogololi kehe konima yoomvula dhi li omulongo.Onkene eishangitho ndyoka ta li kalandulako olyo ndyoka lyo momumvo 2013 lyaantu ayehe,naa mboka ya adha oomvula dhokuhogolola. Omunamibia kehe ena oomvula omulongo na hetatu oku na uuthemba wokuhogolola.Epulo ekwawo olya li ndyoka kutya ngele oonkwatwa naanuuvu ota ya hogolola. Oku za mo 1992 Okomisi yOmahogololo ya Namibia oya ka la hayi tumu uuketha womahogololo womiiyenditho koondholongo, komagumbo gaakokele, nokiipangelo opo yi pe aantu mbaka ompito ya hogolole aakwateli komeho yawo. Shika ota shi ningwa woo nonuumvo. Nena embo lyomadhina gaahogololi ndyoka lya opalekwa no ka li na omapuko ota li nyanyangidhwa. Opwa tegelelwa aahogololi ayehe kumwe ta ya kala membo ndika ta ya kala ye li omiliona yimwe noshikwanu yimwe hamano, konima ngele omaopaleko agehe oga ningwa.Uumbapilahogololo oomiliona ndatu noshinkwanu mbali owa thika nale moshilongo oku za koSouth Africa hoka wa nyanyangidhwa.Uumbapila owa tuminwa nale komahala goshilongo kiitopolwa yoshilongo 13 okutegelela omasiku gehogololo pehulilo lyomwedhi nguka.Okomisi yOmahogololo ya Namibia oya ti ota pa kala omahala gokuhogololela itaa ga lunduluka ge 997 na omahala gomahogololelo ta ga endaenda ge li 2 213, pahapu dha Theo Mujoro omupevi wiliki gweenditho mOkomisi yOmahogololo.Pethimbo lyomahogololo ota pa kala woo oongundu tadhi tonatele omahogololo.Meni lyoshilongo ota mu zi oongundu mbali dholudhi nduka ndhoka ta dhi tonatele omahogololo.Muumbugantu wAfrika ota mu zi aatonateli ye li kohi yuukumwe wa SADC noshowo kohi yoforuma yomagumbo omatotimpango ga SADC. Iigwanahangano, Uukumwe wAfrika , noshowo Uukumwe wa Europa nayo oya tegelelwa ya tume aatonateli yomahogololo. Aataleli yomahogololo mbaka oye na okwiishangitha nOkomisi yOmahogololo. Oya tegelelwa woo ya kale ina ya gama mbinga , yi ithikamena yo ota ya longo paithano.Ehangano lya Namibia Lyuudemokoli (NID) ota li tumu aataleli yomahogololo ye li 300, Oongongahangano yOongeleka mONamibia ota yi kala naataleli yomahogololo konyala ye vule pe 150.Pa mpango yomahogololo aatonateli yomahogololo ya pewa uuthemba ota ya vulu okutonatela omahogololo, eyalulo lyomawi, ekoleko lyiizemo noshowo etseyitho lyiizemo.Nuumvo ota shi ka kala shotango moNamibia, sho iizemo ta yi tseyithilwa pehala kehe mpoka pwa hogololelwa konima sho eyalulo lya ningwa. Oku yalula omawi ota ku tamekwa konima sho uuketha womahogololo wa edhile mo 28 ga Novomba 2009.