Hidipo Hamutenya a popitha AakwaRDP mOndangwa

ENGATHITHI enene lyAakwaRDP olya li lya gongala mOluno mOndangwa mOlyomakaya ga zi ko nokupulakena ketumwalaka ly)Omupresidende gwawo omusamane Hidipo Hamutenya, ngoka e ya lombwele kutya ya ka unganeke oshigwana shi ka hogolole Omupresidende gwo RDP nIilyo yoRDP yOshigongi shOpashigwana momahogololo pehulilo lyomwedhi nguka.

Omusamane Hamutenya ngoka a li a pandula kokugongala nawa kwiilyo naayambidhidhi yo RDP poshigongi shawo pOluno mpoka, ta ti RDP okwe ya a tule po omukanka, omusinda omwaanawa ngoka gu na okulandulwa nawa nokoshigwana shokomongula.’Otu na oshinakugwanithwa oshinene shoku unganekela onakuyiwa yi li nawa, yi na uushili, esimaneko nemanguluko lyoshili,’ omusamane Hamutenya ta ti. Ta ti RDP oku lile po emanguluko lyoshili, ndyoka tali ulike omalunduluko goshili monkalamwenyo yomuntu. Hamutenya ta ti , Namibia naantu yamo natango ina manguluka kemona , oshoka oshigwana onkee tashi si kondjala shoshili, ngashi sha popiwa mehokololo lyIigwanahangano kutya moNamibia omu na aantu ye li po 400,000 ta ya si ondjala. Ta ti, taku tiwa kutya aantu mboka ngele oya li ongula omutenya nokongulohi itaya li we molwashoka kaye na sha shokulanda iikulya, kaye na iikulya. ‘ Shika osho naanaa oshili yoyene. Kayi shi nande Opropaganda,’ Hamutenya ta ti ngawo nokutsikila ko ta ti sho ehokololo ndika lya shangwa ngeyi, Swapo inatya ko sha. Inatya oshoshili nenge iifundja. Hamutenya ta ti, Oswapo oya nyengwa okweeta po elongo lyoshili moshigwana. Aanona onkee taya ndopa nokuninga oombotsotso, molwashoka kaye na Oosikola niilonga. Ohaya uhala ashike momapandaanda moka, taya kongo iilonga. Hamutenya ta ti Namibia ngoka e na aantu taya si ondjala, aanona taya ndopa moosikola, kaa yena iilonga, oye tuu ngoka e na uuyamba wokawe, wongopolo, woshingoli, wo uranium nosho tuu, ashike sigo oompaka, Epangelo olya nyengwa okulonga mo omauyamba ngoka, iiyimati yago yi liwe koshigwana sha Namibia. Hamutenya ta ti, shoka shi li mEpangelo okulya po ashike oshimaliwa shoka shi li po kuyamwe nokwiininga aayamba. Epangelo olya tala ko ashike lya mwena, sho noshigwana nasho osha tala ko ashike.Otashi uhala ashike tashi shuna Swapo kOshipundi a ka tsikile nokulya po iimaliwa yoshigwana. Okwa indile koshigwana shi ka hogolole oRDP. Omusamane Hamutenya ta ti ethimbo alihe ndjoka lya zi ko, otwa kaleni nokukengelelwa kOswapo nEpangelo lye. Onkee ngashiingeyi natu dhilaadhileni nawa, tu lundululeni. Twa vulwa okukengelewa. Inatu endululeni we omapuko ngoka twa ningeni mokukala tatu hogolola Swapo nomapuko ge muule woomvula adhihe omilongombali dha zi ko. Twa kala tatu hogolola Swapo opo yamwe yomaawiliki ye kumwe noyana, aamwayina nokuume kawo ya tsikile nokwiiyambapaleka, pamikalo dhi ili nodhi ili mwa kwatelwa ekuthopo lyiimaliwa mbyoka ya zile kOchina, ya li ya nuninwa mboka itaya vulu, ndele taye yi kutha po noku yi pa aanona yawo ye kiilongithe nayo. Ngaye shi ndile ngeyi, aanona yandje onde ya longitha noshimaliwa tashi zi moondjato dhandje mwene. Kandi na esiku limwe nda kuthile oshimaliwa mOshiketha shEpangelo shi ka longithe aanona yandje, ngashi mboka yomEpangelo lyOswapo taye shi ningi,’ Hamutenya ta ti ngawo. Yakwetu, tu dhimbulukweni mo iinima ndele tatu ka hogololeni RDP, opo pu ye Epangelo lya yela, lyaa na uulingilingi. Shika oshoshili, tandi mu lombwele. Tu tuleni utale koshipundi, ndele tamu mono oshili. Ngele omwe tu tula ko koshipundi ndele inatu longa ngashi twe mu uvanekela, nena tu kutheni ko koshipundi ndele tamu tula ko ishewe yalwe. Ashike otandi mu uvanekele nda mana mo kutya ngele omwe tu hogolola, otamu ka mona iiyimati yiilongayakulo yetu kune,’ Hamutenya ta ti.