ONKUNDANA okuzila kOkahenge moshitopolwa sha Kavango otayi ti kutya Mayola gwondoolopa ya Nkurenkuru, Heikku Hausiku, okwa ningi eindilo kEpangelo li topole oshitopolwa sha Kavango miitopolwa iyali.
Shika okwa hala shi ningwe molwashoka aniwa oshitopolwa shika oshinene noonkondo na shika osha eta shi kala oshidhihu okukwathela aakalimo ayehe nawa.
Okwa ti molu uunene woshitopolwa shika, iikandjohogololo yamo yi li omugoyi – nayo oyi li wo iinene okukala yi na Kaansela gumwe.
Hausiki shika okwa li e shi popi poshituthi shokudhina egwanitho lyoomvula 49 dhetotopo lyopaati yo Swapo, shoka sha li sha ningilwa pu Nkurenkuru mOlyomakaya ga zi ko.
Hausiku okwa ningi wo eindilo kUuministeli wUundjolowele u tunge Oshipangelo oshipe pu Nkurenkuru,opo shi kwathele wo nAangola mboka haye ye mondoolopa ndjika.
Pethimbo ndika, mondoolopa ndjika omu na ashike Osenda yUuhaku yimwe pu Nkurenkuru. Ominista yUundjolowele, Richard Kamwi, okwa yamukula kutya otaku ningwa oonkundathana nElelo lyOpamuthigululwakalo lyAakwangali, dhi na sha nokutunga Oshipangelo pu Nkurenkuru.
Kamwi okwa ti Elenga ekuluntu lyAakwangali olya ti kutya Uuministeli otau vulu okwoopaleka Osenda yUuhaku ya Nankudu Health Centre nenge u tunge Oshipangelo oshinene.
– Nampa
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
