Hamutenya na kuthwe uukahewa wa Haihambo

AAKALIMO yomomikunda Omutwewomunhu, mboka uunona wawo hawu hiti osikola pOsikola yomomukunda gwawo moka yedhina Haihambo, oya gongalele mEtiyali lyoshiwike shika pomukunda gwawo nokuninga eindilo ye li ukitha ku Kaansela gwOshikandjohogololo shawo sha Pembe, Johannes Kamati Nakwafila kutya uukahewa kosikola yawo Haihambo mboka wa pewa Omupresidende gwo RDP, Hidipo Hamutenya e wu kuthwe meendelelo ngashi tashi vulika oshoka etokolo lyatya ngawo lyoku mu ninga kahewa kOsikola ndjoka inali enda pamulandu nandenande.

Omusamane Hidipo Hamutenya okwa ningilwe kahewa kosikola ndjika, pambelewa, petameko lyomwedhi gwa zi ko (Maalitsa). Ano meti 2 Maalitsa 2012. Esiku ndyoka, Hamutenya, okwa gandjele omagano goodola dha Namibia tadhi ihilile pomayovi omulongo (N$10,000) noshowo oongonga dhoondhalate odhindji nelalakano kolugumbo lwosikola ndjoka ku tulwe olugumbo lwondhalate noshowo otenga onene yomeya. Ta uvaneke wo taka tsikila nokukwathela Osikola ndjoka moompumbwe dhayo dhi ili nodhi ili.Oshigongi shomEtiyali shoka sha popithwa ku Kansela gwoshikandjohogololo sha Pembe, Nakwafila, osha li sha wilikwa ku Amushanga gwoSwapo mOshitayi shOmuntwewomunhu, Julia Shindume.Kaansela Nakwafila okwa lombwele oshigongi kutya ye okwe ya pambelewa, sha etwa kombapila e yi shangelwa kaavali nenge kaakwashigwana yomomukunda Omutwewomunhu, moka ta ya nyenyeta oshinima shokuninga Omupresidende gwo RDP, Hidipo Hamutenya kuume nenge kahewa kosikola yawo Haihambo kuyele omwedhi gwa zi ko. Mombapila ndjoka, Nakwafila ta ti, aakalimo nenge aavali yaanona haya hiti osikola poHaihambo, otaya nyenyeta kutya euliko lya Hamutenya ongakahewa kOsikola ndjoka inali enda nawa nopauyuki, oshoka olya nika opolitika na inaya hala osikola yawo yi kale ya ningwa yopapolitika. Otashi ka etela aanona yawo nosikola yawo uupyakadhi neshunomonima. Taya ti kutya Hamutenya, Omupresidende wo gwOngundu yompilameno na itashi shiwa a kale kahewa kosikola yawo. Oye shi tala ko sha nika opolitika nosikola yawo monakuyiwa yi ka kale osikola yongundu yompilameno. Nakwafila ta ti ye mwene okwe ya nee okuuva kaakalimo yomOmutwewomunhu kutya oyo ya shanga shili ombapila ndjoka nokutula mo enyenyeto ndjoka nenge hayo.Aakalimo moshigongi moka oya lombwele nee kansela gwawo Nakwafila kutya oyo ya shanga ombapila ndjoka. Ye uvite uudhigu kOmukuluntusikola gwosikola yawo ya Haihambo, Rosalia Ndamanomhata naakwaRDP yakwawo ya longitha uuthemba waavali kuyoyene nokuulika noshowo okutaamba Omupresidende gwo RDP Hamutenya a ninge kahewa kosikola yawo inaye ya lombwela yo ongaavali yaanona haya hiti Osikola mpoka. Taya ti kutya Omukuluntusikola okwe ya kengelela. Taya ti wo kutya omukuluntusikola ohi iningile iinima yosikola nomatokolo oye awike. Ka ithana po yalwe melongo mpoka. Aakalimo taya lombwele Kansela Nakwafila kutya yo inaya hala nande Opolitika posikola yawo mpoka, unene tuu ndjoka yompilameno. Onkee otaya indile uukahewa wa Hamutenya nosikola yawo wu kuthwe po meendelelo ngashi tashi vulika. Yo wo iinima mbyoka ya pelwe Osikola yaHaihambo ongomagano, yi shunithilwe mwene gwayo. Nange wo otashi vulika, Omukuluntusikola gwa Haihambo, Ndamanomhata, a kuthwe po wo pOsikola mpoka, nenge osikola yi lundululwe po mpoka. Taya ti kutya inaya hala osikola yawo yi ningwe osenda nenge oshigunda shokulwila oongundu dhopolitika nande.Moku ya yamukula keindilo lyawo, kansela Nakwafila , okwa ti kutya Ombelewa ye otayi ka longekidha po Oshigongi shimwe oshinene meendelelo ngashi tashi vulika. Tashi vulika shi ka ningilwe pOsikola yaHaihambo, moka aavali taya ka gandja euvonayi lyawo ndika nokukaninga nee etokolo lya hugunina moshinima shika shuukahewa kosikola yaHaihambo. Nakwafila ta ti, otaya ka tala kutya mOshigongi muka mu ka kale Ombelewa onene yElongo mOshitopolwa sha Hangwena noshowo Ombelewa ya Gavena yOshitopolwa sha Hangwena, Ombelewa ye yOshikandjohogololo sha Pembe, Omukuluntusikola, aalongi, aanasikola noshowo Ongunduwiliki yEtonatelonongelo lyosikola yaHaihambo naavali nee kumwe noshigwana shomOmutwewomunhu. Nakwafila ta ti kutya oshilongo sha Namibia otashi pangelwa paudemokoli notashi ka vulika ku ka longithwe omake kutya mboka ye shi hala naamboka inaye shi hala ya yeluthe omake nenge ku ka longithwe uumbapila mokugandja omake ngoka. Moku mu pula, Omukuluntusikola Ndamanomhata, okwa ti kutya ye ina lombwelwa pambelewa oshinima shoka. Ta ti okwa yakelelwe ko ashike konzo ye yimwe kutya otapu ningwa iigongi yi li ompinge nuukahewa komusamane, Hamutenya kosikola yawo noshowo sho ye a zimine aniwa oshinima shoka nokutaamba omagano gomusamane Hamutenya ngoka ape osikola ndjoka. Omuwiliki gwElongo, Sanet Steenkamp, kepulo naye okwa ti ina uva oshinima shoka pambelewa. Ta ti ngele oya fatululilwa nawa kutya uupyakadhi owa shike naana, nena oko taya yi koshigongi shoka, sha dhilaadhilwa. Ta ti wo kutya oshinima shokuninga omuntu kahewa kosikola oshinima shaavali, ano shaakalimo yomomukunda moka mu na Osikola yawo ndjoka. Yo ohaya kutha ashike ombinga uuna taku lukilwa omuntu osikola. Ano, haku gandja eziminino kOmbelewa ya Amushanga Omukuluntu gwElongo. Amushanga gwo RDP moshitopolwa sha Hangwena, Timotheus Shikongo, okwa ti ye okwa halulwa kwaashoka she ya po sha guma uukahewa wOmupresidende gwo RDP Hamutenya kosikola ya Haihambo. Ta ti shoka Aawiliki yOswapo ya tsitsimike aakalimo ya kale ompinge noshinima shoka. Ta ti yo oye shi shi kutya opu na Aanapolotika yOswapo ya ningwa ookahewa kOosikola noya lukilwa wo Oosikola moshilongo, unenene tuu moshitopolwa shika shomoNooli. Ta ti Amushangandjayi gwoSwapo, Pendukeni Iivula-Ithana okwa lukilwa Osikola mOshitopolwa sha Musati na oshowo Omuprima Nahas Angula mOshikoto, Omupeviminista Chief Ankama mOshana na Gavena ya Hangwena Usko Nghaamwa mOhangwena noshowo yalwe oyendji. ‘ Oshinima Oswapo ashike ina hala Omupresidende gwoRDP, omusamane Hidipo Hamutenya a ningwe kahewa kosikola yaHaihambo. Kashi shi shili, aakwashigwana yaahoka nande nande.