Hailulu ota fala ACC kOmpangu

OMUKULUNTUWILIKI gwOkampani ya National Housing Enterprises (NHE), Vincent Hailulu ota fala Okomisi yi na sha nEkondjitho lyiilonga yOkoraupto/Anti Corruption Commission (ACC) kOmpangu yOpombanda, molwashoka aniwa oya yona uuthemba we sho ye mu kwata po omasiku ga zi ko.

Aanavetakalelipo ya Hailulu, Sisa Namandje & Co, oya popi kutya otaya ka ninga eindilo kOmpangu ndjika konakone omatokolo noonkatu dha katukwa ku ACC, shoka sha eta ekwatopo lya Hailulu a omwedhi gwa zi ko.
Okampani yaanaveta ndjika oya popi wo kutya oya ninga wo natango eindilo lyomeendelelo kOmpangu ndjika, moka Hailulu ta lwitha eidhopomo lya ACC miinima ye.
Hailulu ota ti kutya ACC okwa yona uuthemba we wopakotampango manga ina kwatwa nokonima sho ye mu kwata po. Aanaveta ye otaya ka kala nee ya hala okuuva kutya oshe ende ngiini ACC a kwate po Hailulu noku mu ningila oshipotha, omanga omakonakono kombinga ye ina ga manithwa.
Shika osha ningwa wo aniwa ina ku gandjwa elombwelo kOmutamaneki-Ndjayi kutya Haululu na kwatwe po. Hailulu okwa li a kwatwa pehulilo lya Novemba, konima sho aanambelewa ya ACC ye mu thikama noshizemo shomakonakono kombinga ye guule womvula.
Otaku popiwa kutya Haululi okwa li i iyambapaleke noshimaliwa shOkampani, a futu iinima yopaumwene nOkakalata kOkampani nosho wo aniwa a li gandja iilonga noyela aaniilonga mOkampani ina landula omilandu.
Omunashipundi gwEwilikongundu lya NHE Omuprofesora Gerhard Totemeyer naye okwa kwatelwa mo miikoya ya Hailulu. Otaku popiwa kutya Hailulu na Totemeyer oyo ooyene yOkampani yedhina Paradigm Consultancy na aalumentu mbaka yaali, oya li aniwa ya longitha oshimaliwa sha NHE miilonga yOkampani yawo ndjika.
Ota ku popiwa kutya Hailulu okwa a gwedhele paulingilingi oshimaliwa shomalweendo noshomekutu sha Totemeyer (ong’Omunashipundi gwEwilikongundu lya NHE).Totemeyer okwa li aniwa e na okukala ha mono Oondola/N$400, ihe Haulilu oshimaliwa shika okwe shi tula pOondola eyuvi nomathele gatano.
Okwa li wo aniwa a longitha okakalata ka NHE mokufutila omulalo gwawo (na Totemeyer) pethimbo ya li mosheendo shopambelewa ku China. Shika osha puka molwashoka, ACC ta popi, aalumentu mbaka yaali oya li ya pewa oshimaliwa sha gwana iinima ayihe, mwa kwatelwa omulalo niikulya. Oonzo dhomauyelele dhi shi okwiinekelwa.
ACC okwe shi mono wo kutya momasiku Febuluali 2007, Hailulu okwa li aniwa a gandja opoosa yOkuungaunga nOmikulu mu NHE, ihe okangundu hoka ka li ka ningi omapulapulo gaantu mboka ya li ya hala opoosa ndjika oka li ka ulike omuntu gulwe kutya oye e shi enditha nawa.
Natango momasiku 19 ga Maalitsa 2007, Hailulu okwa li aniwa yela omuniilonga gumwe pamukalo inagu uka nogwokoraputo.
ACC okwa ningile wo Hailulu oshipotha shelongitho lyoshimaliwa sha mofamili ye nokuye mwene iikando iyali momumvo 2006.
Mu shimwe shomiikando mbika, Haulilu okwa li aniwa longitha Okakalata kOkampani mokulanda iinima ye yopaumwene mOsitola ya Pick ‘n Pay.
Hailulu okwa li a holoka mOmpangu na oshipotha she oshuundulilwa komasiku 27 ga Febuluali 2009.
Okwa li a mangululwa sho a futu ombooloha na ngashiingeyi okwa shuna kiilonga.