Hailulu ota fala ACC kOmpangu

MUKULUNTUWILIKI gwOkampani ya National Housing Enterprise (NHE), Vincent Hailulu, ota fala kOmpangu Okomisi yi na sha nekondjitho lyiilonga yOkoraputo/Anti Corrupition Commission (ACC).

Hailulu ota fala kOmpangu omuwiliki gwa ACC Paulus Noah, ehangano lyomahangano gaaniilonga mu Namibia, ehangano lya Namibia Financial Institutions Union (Nafinu) naawiliki yomahangano ngaka gaali. Oombapila dhe okwe dhi gandja kOmpangu mEtitatu lyoshiwike sha zi ko. Hailulu okwa li a kwatwa po ku ACC mu Novemba gwomumvo gwa zi ko – paindilo lya NUNW nongundu yimwe yaaniilonga ya NHE, taku popiwa kutya okwa longa iilonga yokoraputo mu NHE. Nande ongaaka, Hailulu okwa li a sindana moshipotha shika, sho Omupanguli gwopakathimbo Johan Swanepoel a li a tokola kutya oshipotha she nashi talululwe e ta ekelehi ekwatopo lye. Hailulu okwa li taku popiwa kutya okwa li aniwa a longiotha oshimaliwa sha NHE miinima yopaumwe, a longitha uukalata woshimalwia wa NHE mokulanda iinima yopaumwene na okwa li wo aniwa a yele aaniilonga ina ku landulwa omilandu. Nande ongaaka, Hailulu okwa li a popi kutya shika osha li ashike te shi popilwa opo a kuthwe oshipundi she na osha li shi lilwe komeho ‘kuukuumwe kau li pauyuuki’ pokati ka NHE naaniilonga mboka ya kuthwa miilonga mu NHE. Nafinu okwa li a gama kaaniilonga mbaka, mboka ya li ya geela Hailulu sho ya kuthwa miilonga.