Haaniilonga oyendji ya kanitha iilonga yawo

KONYALA aaniilonga yeli lwopo 60 oyo ye li moshiponga shoku kanitha iilonga yawo omolwa etulo miilonga lyoveta ompe yaaniilonga petameko lyomwedhi nguka.

Komufala gwaaniilonga, Bro-Mathew Shinguadja okwa lombwele oThe Namibian kutya okuza tuu sho oveta ndjika yatulwa miilonga petameko lyaAuguste, omahangano gane oga tseyithile ombelewa ye kutya otashi vulika ga kuthe aantu miilonga omolwa etulomiilonga lyoveta ndjoka. Aaniilonga mboka yeli moshiponga oku kanitha oshikwiila shawo shokomwedhi kehe oya kwatelamo 20 okuza kehangano lya Edu Letu, 14 okuza ku Africa Personnel Services[APS] noshowo aaniilonga yaali, lwopomulongo okuza momahangano galwe ngoka haga hehelitha aaniilonga.Shinguadja okwa ti aaniilonga ayehe mboka yataalela oku kanitha iilonga ayehe oomboka haya longo moombelewa dhomahangano ngoka, ndele mbaka kayeshi mboka haya ka longela omahangano galwe ongo aaniilonga yopakathimbo.Okwa ti shoka eshi ooshoka kutya omahangano oga ulike kutya otashi vulika ga kuthe aantu mboka miilonga ndele inaga popya lela shuukilila kutya ota ge ya kuthamo miilonga. Omahangano gokuhehelitha aaniilonga opamwe nehangano lyaagandji yiilonga lya Namibia [NEF ]oya londodhele kutya ngele oveta ndjoka oya tulwa miilonga otayi ka fala mekanitho enene lyoompito dhiilonga. Mwene gwehangano lya Africa Personnel Services, Ranga Haikali okwa lombwelele o The Namibian inaa pa pita ethimbo ele kutya aaniilonga yevule omayovi 7 000 mokati kaaniilonga moshitopolwa shoka yeli omayovi 10 000 otashi vulika ya ka kanithe etemo lyawo ngele oveta ndjoka oya tulwa miilonga.Ndele Shinguadja kombinga ye okwa ti iniitaala kutya otaku ka kala ekanitho enene lyoompito dhiilonga lyatya ngaaka.Okatokolwa oka 128 koveta ya lundululwa yaaniilonga otaka utha kutya uuna ehangano lyontumba lya kutha omuniilonga okupitila mehangano lyokuhiilitha aaniilonga nena omuniilonga ngoka ota talikako omuniilonga gwalyo. Onkene omolwashika nguka oku na okufutwa oshimaliwa sha faathana naaniilonga mboka yomehangano ndyoka noshowo ota kala nomauwanawa agehe ngaashi ngoka haga pewa aaniilonga yomehangano ndyoka.Oveta ota yi utha woo kutya uuna omuniilonga ena okutidhwa ngoka okuna tidhwa tapa landulwa oveta. Ishewe uuna omuniilonga ta kutwa miilonga oku na oku kutwa nomauwanawa gafa gaaniilonga ooyakwawo mehangano ndyoka.