Gwedhiiko manga ina mu tuma pondje

NAMIBIA okwa hala omahangano goomina ga kale noku gwedha ko sha kiifulwa mevi mbyoka haga mina omanga mbika inaa yi tuminwa kiilongo yilwe.

Shika padhiladhilo lyomu Prima Nahas Angula otashi eta po iilonga, na otashi gandja ompito kepangelo opo li kungune nokweetamo iiyemo ta yi zi miifuta yoompale dhokupitithamo iifulwa mevi.Angula okwa ti monakuyiwa epangelo ota li ka thiminikwa opo li idhopemo, oku tala kutya omahangano goomina miikaha yaakwiilongo otaga gandja iilonga komahangano ga Namibia nookaantu ya Namibia. Shika Angula okwa ti otashi vulu okuningwa uuna ndoka iipumbiwa yimwe mbyoka omahangano goomina haga pumbwa ta yi vulu oku gandjwa kugo kaaNamibia.Namibia okuna uuyamba wokawe, ongopolo, uranium, omanga natango omahangano giikwamina ota ga kongo iitenda ngaashi oshingoli, oholo oshiyela na yilwe.Okwa ti epangelo ina li hala okumona iikwamina ya Namibia aluhe ta yi tumwa mo inaa yi longwa sha, osho a popi pethimbo ta popitha oshigongi shehangano lya Rio Tinto.Okwa nyenyeta ishewe kombinga yoshinima shoka kutya olundji omawilikongundu gomahangano ngaka ka gena aaNamibia haya kuutuumba moka noku ninga omatokolo. Okwa thaneke kutya padhikwe oshiketha shoku longa nokudheula aaNamibia kombinga yiikwamina.Okwa ulike kutya shoka sha ningwa sigo oompaka oku tula aaNamibia mewiliko lyoomina osho ashike okwoopalela, nomukalo gwokutopagula opo aantu ya kalekwe muudhi natango.Angula okwa lundile omahangano gamwe kutya ngaka ohaga landitha po iikwamina ya Namibia komahangano gaashi goshili ,ngoka ashike taga adhika ga shangwa mombapila.Pamukalo nguka iihohela yokulanda, nenge iifuta yetaambathano ihayi futwa molwa uuwanawa woshilongo.Okwa indile woo omahangano gokumina opo ga opaleke omudhingoloko mpoka haga longele unene tuu ngele iilonga yago yokumina oya adha ehulilo.