Gumwe a kwatonkonga yinakulululwa

OPOLISI yomoshitopolwa sha Shana oya kwata po omulumentu omugundjuka gwoomvula 30 gwomomukunda Eefadoukadona popepi nOngwediva moshitopolwa sha Shana shi na sha nekwatonkonga lya yinakulululwa mEtitano lya zi ko.

Omulumentu nguka,a holokele nale mOmpangu ya Mangestrata mOshakati, gwedhina Stefanus Fillemon, Opolisi otayi ti kutya pomasiku tuu ngoka ga zi ko okwa lalele noshikombo shomushiinda shawo.
Aniwa a hokolola ye mwene kutya okwe shi lala nokoondoma.Yinakulululwa ngoka a kwata koonkondo otaku tiwa kutya ngeno momashangelo oku na oomvula 85, ashike nee oyendji otaya ti kutya ndhoka hadho oomvula dhe, okuvule po mpoka notaku tengenekwa kutya oku li kombanda yoomvula omilongomugoyi.
Otaku tiwa kutya Fillemon okwa li kohango pomukunda gwawo mpoka nomokuza ko kwe ongula onene yEtitano lya zi ko, okwa tokola a ka pite pooyinakulululwa mpoka, mpoka a adha yinakulululwa nguka a lala natango mondjugo ye nokatekulululwa ke.
Nakufekelwa nguka, okwa yi mo mondjugo nokukwata aniwa yinakulululwa nguka koonkondo nomiikilikita moka okwe mu tsu wo ombele mokooko. Okatekulululwa ka yinakulululwa hoka, kumwe na yinakululululwa oya kala taya lili nokukuga. Aashiinda oye ya nashi ya pula omukulupe kutya okwa ningwa shike, okwa ti okwa kwatwa koonkondo kemhwanka nolye mu ehameke wo ngawo kokooko. Aashiinda oya fala omukulupe koshipangelo shEpangelo sha Shakati nokulopota wo oshiningwanima kOpolisi.
Pauyelele wa pewa Opolisi kuyaandjamukulupe, Opolisi oya kwata po Stefanus Fillemon (30), ngoka pa Polisi a zimine kutya oye a kwata omukulupe koonkondo noku mu tsa nombele. Kepulo e li pulwa kOpolisi, aniwa okwa zimine wo kutya okwa lala shili noshikombo sha mushiinda shawo, e shi lala nokondoma, ashike okwa hokolola kOpolisi kutyasho a kwata omukulupe koonkondo, aniwa ina longitha sha, ano ina longitha okoondoma.
Sho a kwatwa ngeyi okwa patululilwa oshipotha shekwatonkonga neehameko lyolutu lwomuntu shi nyanyaleka noonkondo. Oshipotha shelalo noshikombo, inashi kwatelwa mo kwali mwaashikaOkwa holoka nee mOmpangu ya Mangestrata mOshakati noshipotha shekwatonkonga omukulupe ngoka nosheehameko lyomuntu nayi noonkondo kolutu.
Fillemon ina pewa uuthemba wokwiifutila mo manga mondholongo noshipotha she oshuudulilwa komeho omolu omakonaakono gOpolisi.Oshiningwanima shika, shomuntu ta kwata yinakulululwa oonkondo ngeyi, osha halukitha oyendji yomomukunda ngoka Eefadoukadona naayehe ye shi uva.
Omupopiliko gwOpolisi mOshitopolwa sha Shana, Shisaande Christina Fonsecka, okwa ti kutya Opolisi nayo oya halukithwa koshiningwanima shika noonkondo. ‘Oshinima shika otashi ipulitha omuntu kutya oshike naanaa ano shi li momitse dhoshigwana oshigundjuka shomoshilongo shetu. Iikwashike mbyoka tashi ningi ano? Omuntu ka tila epenge oha kwata yinakulululwa koonkondo.
Yakwetu oshigwana, natu dhilaadhileni po nawa mpoka, kashi li we nawa,’ Shisaande Fonsecka ta ti ngawo nonkumwe onene nokwiindila koshigwana, unene tuu shoka oshigundjuka, shi ikonaakone nawa.
Shi ipule muule washo nokweetha po okuninga iinima iiwinayi yatya ngawo moshigwana. Fonsecka okwa lombwela wo The Namibian kutya momukunda omo tuu moka mehuliloshiwike omwa kwatwa okanona koomvula omulongonayimwe koonkondo.Nakukakwata koonkondo naye okwa kwatwa po nale nokwa holokele mOmpangu ya Mangestrata mOshakati.
Okuzilila kOndholonga yOpolisi kOndangwa otaku tiwa kutya omulumentu gumwe gwomunandholongo omuzaizai okwa kwata koonkondo omunandholongo gwomulumentu omukwawo gwOmuwambo koonkondo.
Naye okwa patululilwa oshipotha shuusoondomi nokwa holoka wo naye nale mOmpangu ya Mangestrata kOndangwa. Iipotha yawo ayihe oya tsilikwa omolu omakonaakono gOpolisi.