Guebuza oye a sindana omahogololo pauperesidende moMozambique

OMUPERESIDENDE Armando Guebuza oye omusindani gwomahogololo ngoka ga ningilwe oshiwike sha yi moMozambique.

Esindano lya Guebuza olya tseyithwa koongundu mbali tadhi tonatele omahogololo ngaka omaandaha.Frelimo, ongundu ndjoka ya kala ta yi lele Mozambique oku za kemanguluko 1975 oyi na ooperesenda 71 dhomawi konima sho ooperesenda 89 dhomawi dha yalulwa ,pahapu dhehangano ha li ithanwa Center for Public Integrity me- longelokumwe nehangano lyiilyo yooparliamende ya Europa.Guebuza okwa sindana omahogololo guuperesidende nooperesenda 76, shiikwatelela komayalulo ga zi kiitopolwa ngoka ta ga ulike kutya,omuleli nguka ta kondjele oshikako oshitiyali shuuperesidende nosho sha hugunina oku li komeho lela mesindano lyomahogololo okuyeleka naakondjithi ye.Omahangano ngaka gaali oga nyola moshinyolwa shago kombinga yomahogololo ta ga ti ‘Guebuza a sindana oshilongo ashihe’.Ehala etiyali mesindano olya yi komuleli gwongundu yompilameno yoRenamo yomusamane, Alfonso Dhlakama, ngoka a mono oopereseda 15 dhomawi.David Simango ngoka a zi moRenamo nokwatotopo ongundu ye Democratic Movement of Mozambique oye omutitatu nooperesenda 9.Iizemo ya hugunina oya tegelelwa mu 12 ga Novomba konima ngele aanambelewa yomahogololo ya tula kumwe iizemo yomiitopolwa ayihe noshowo ya yalula uumbapila mboka wa yonuka.Omahogololo ngoka ga ningilwe metitatu lya ziko ogo omatine oku za sho iita yo pashigwana yoomvula 16 ya li pokati ka RENAMO na Frelimo ya hulile po, no ya landulwa kedhiko po lyuudemokoli woongundu odhindji mo 1994.