Gono na Tomana naya thige po iilonga: MDC ta ti

HARARE – Ongundu yompilamena mu Zimbabwe yo Movement for Democratic Change (MDC), oya ningi eindilo kutya Omukuluntu gwOmbaanga yEpangelo, Gideon Gono na Hahende-Ndjayi gwEpangelo, Johanness Tomana, naye thige po iilonga meendelelo.

Eindilo ndika oli li limwe lyomomatokolo ngoka ga ningwa po ku MDC pOkonferensa mu Harare, ndjoka ya hulu mOsoondaha ya zi ko.
Pethimbo ta tseyitha shoka sha tokolwa po, Amushanga-Ndjayi gwa MDC, Tendai Biti, okwa ti kutya molwashoka opu na oontamanana kombinga yaamboka ye na okupewa oopoosa ndhika mbali, MDC ota indile Tomana na Gono ya thige po iilongo, opo ku yandwe iikolokosha moshilongo.
Omuwiliki gwa MDC Morgan Tsvangirai oya li ya toto po Epangelo lyOpaukumwe nOmupresidende Robert Mugabe mu Febuluali nuumvo, konima sho ya tsu kumwe mu Septemba gwomumvo gwa zi ko, ya hulithe po omaupyakadhi ngoka ge li moshilongo.
Mugabe okwa ti kutya Gono na Tomana oya pewa iipundi mbika pakotampango na otaya kala niipundi yawo mbika molwashoka inaya ninga sha sha puka.