Gift, Ghilherme na Thompson ya fumvikwa

AAGUNDJUKA yatatu, Omudhanigwoongalo Eufemia Magano Marten a tseyika wo nawa nedhina Gift gwomomukunda Ondjondjo popepi nOkatana mOshitopolwa sha Shana, gwoomvula omilongondatu, noshowo aamwayinathana yaali yomOshakati mOshitopolwa sha Shana, ano Ghilherme Manuel Moche (27), na Thompson Ndoku Moche (25) , mboka ya manene oondjenda dhawo omasiku ga zi ko , oya fumvikwa mOlyomakaya ngaka ga zi ko.

Aagundjuka mbaka oya li ya fumvikwa komangathithi gaalilasa, konima yiituthidhimbuluko yawo mbyoka ya ningilwe kongulohi yEtitano lya zi ko pomagumbo gaakuluntu yawo pomahala gayooloka. Ghilherme na shilandula she Thompson, aamati yomunangeshefa a tseyika nawa gwomOneshila mOshakati, mwene gwongeshefa ya tseyika nawa Shitenya Bar, oya si moshiponga shohauto, sho ohauto moka ya li mo yOkatekisa yi idhenge mumwe nOhauto onkwawo yOkatekisa popepi nOndangwa mondjila onene ya Ndangwa nOshikango omutenya gweti 18 Apilili 2009.
Thompson opo a li a hulithile poshiponga moka omanga Ghilherme a ka hulithila kOshipangelo sha Nandjokwe meti 22 Apilili 2009 hoka pamwe nayakwawo yaheyali ya li ya falwa meendelelo konima yoshiponga shoka shi nyanyaleka noonkondo kwali.Nakusa Ghilherme okwa li omulongwa ko Politech ya Namibia omanga nakusa Thompson a li omuniilonga mo Cash Build mOshakati. Kaya li oomakeeninga, ngashi sha popilwe mOshifo shika mEtitano lya zi ko. Ombili.
Omudhani gwoongalo dha nika dhopambepo a tseyika nawa Gift, ano Eufemia Magano ya Marten, okwa manene oondjenda dhe mOvenduka meti 20 Apilili 2009 konima yuuwehame.Ghilherme na Thompson oya fumvikwa momawendo gElelo lya Ngwediva mOlyomakaya ngaka ga zi ko okuzilila pegumbo lya tate gwawo Matias Moche pOshitenya Bar mOneshila mOshakati mpoka pwa ningilwa Elongelofumviko.
Elongelofumviko inali ningilwa we mOngeleka yawo ya Katoolika ka Roma mOshakati molwashoka aniwa kaya li haya ende ko kOngeleka hela ya shashelwe. Omuhiki gwOongalo Gift, okwa fumvikwa pOkatana mOlyomakya tuu ngoka ga zi ko.