Geingob a hili aayambidhidhi oyendji

SHO osheendo sha Hadago ano onomola yopaumwene yosheenditho sha Hage Geingob sha thiki pokapale ka Mokati mOtjiwarongo Olyomakaya ga yi, ongundu yaantu mboka ya li ya tegelela omupeviperesidende gwoSwapo oya tameke okwiimba okundanisa noku mu tanga. Naashi Geingob a zimo mosheenditho she nguka okwa taambwako ongo ependa.

Apehe mpoka to tala opwa li efuta lyolwaala olumbulau, olutiligane naandoka lwaziza, netumwalaka komilungu dhaayehe ya li mpoka oondyoka kutya esindano omolwa oshipundi shuupeviperesidende olya Hage.Omuyambidhidhi gwe gumwe okwa ti kapena omalimbililo oshigwana osha popya, Hage oye ta thigalapo a thikama. Mboka ya li poshigongi shoka omwa kwatelwa oongoloneya, Sophia Shaningwa , a za kOmusati, Penda ya Ndakolo, Omushikoto, Usko Nghaamwa gokOhangwena, Cleophas Mutjavikua a yambuka mErongo, Rapama Kamehozu gwomOtjozondjupa na Katrina Hanse Himarwa gwoshitopolwa sha Hardap.Mbaka ayehe oya uvaneke taya yambidhidha Hage Geingob moonkambadhala dhe oku shuna muupeviperesidende wo Swapo, poshigongi oshinene shongundu ndjika oshiwike shika. Oongoloneya oya joinwa kaakwatakanithi yongundu yaza kiitopolwa, kookansela noshowo koomeya mwakwatelwa mboka yaza ko Caprivi, Kunene, Omaheke, Khomas nomoshitopolwa Otjozondjupa. Aawiliki yopashigwana mboka yuulike eyambidhidho lyawo ku Hage Geingob oya kwatelamo, amushanga ndjayi gwopevi gwo Swapo, Nangolo Mbumba, Kilus Nguvauva, Immanuel Ngatjizeko, Netumbo Nandi Ndaitwah, Charles Namoloh,Calle Schlettwein, Nickey Iyambo, Pohamba Shifeta, Margaret Mensah Williams, Peter Katjavivi, Elaine Trepper, Gerson Kamatuka, na Ambrosius Kandjii. Aanangeshefa mboka ya li poshigongi shoka oya kwatelamo Desmond Amunyela oshilyo mongeshefa ya Paragon Investments Holdings, Amos Shiyuka gwa Mobipay, nomuhikingalo, Lazarus Gazza Shiimi, ngoka a ti eyambidhidho lye ku Hage Geingob olyo ooperesenda 110.. Yalwe mboka yali mpoka oyo , Mandela Kapere, na Natangwe Ithete ya za ko National Youth Council. Aawiliki pamithika dhawo oya uvaneke taya ka yambidhidha Geingob momahogololo ngoka.Gavena gwokOmusati okwa ti yo ita ya holeke kutya olye taya ka hogolola, yo otaya hogolola , Hage Geingob. Okwa pula kutya omolwa shike keena oku hogololwa nokwa indile aakwashigongi pokongressa ye mu hogolole noku landula oshiholelwa she ngoka eli gavena gwOmusati sho a ti eke lye ota li ulike Geingob, Okwa tsikile a ti ngoka inaa hogolola Geingob ota ka kala ta kugilwa komaiyuvo.Shaningwa oye ishewe ngoka a gandjele ethaneko poshigongi shongundumutima kutya ongundu na yi kuthepo oshinima shehogololo lyomupeviperesidende noku tula miilonga osheetwapo kutya omuntu ngoka eli moshipundi shuupeviperesidende oye ashike na pewe iilonga mbyoka pwaana, ehogololo. Omupe amushangandjayi, Nangolo Mbumba okuna einekelo kutya esindano ota li ningi lya Hage Geingob. Mbumba okwa ti okwa pandula oongodhi ndhoka Pohamba a dhengele aakwatakanithi yongundu. Geingob moshipopiwa she okwa ti ngele Kalunga okwa hala oye a sindane oku ninga omuleli gwoshilongo shika nena shoka otashi ka ningwa.Okwa lombwele aayambidhidhi ye yaa ka hogolole molwaashoka ya hala Hage ndele naya hogolole omolwa onakuyiwa yoshilongo shawo. Onkene mbaka na ya hogolole ombili nuukumwe. Konima yoshipopiwa she okwa ka popya naantu mongundu, omanga inaa thigapo oshigongi.