Gandjeni eyakulo lya pumbiwa Geingob a indile

MINISTA yIipindi Noofabulika, Hage Geingob okwa indile aaniilonga muuministeli we ya longe nuudhiginini mokugandja omayakulo ga pumbiwa kaantu ayehe moshilongo, peha lyokwiitungila uugumbo wawo miikondo moka ye limo.

Okwa ti okwa hala okumona omayakulo taga pewa aantu ayehe oshilongo ashihe pamulandu gwondungethaneko yopashigwana yepangelo.Geingob okwa ningi eindilo ndika pethimbo lyoshigongi sho masiku gaali gomalongekidho sha ningililwe poMokuti Lodge mOshikoto oshiwike sha piti. Oshigongi osha li sha kalwa kongundu onene yaanambelewa yoombandi dhopombanda muuministeli mboka noshowo omitse dhomahangano. Geingob poshiithananene shoka okwa li a tsu omuthindo kompumbwe yoku ninga omathaneko , a ti osho oshipatululo oshinene, naashika oshina okweendela pamwe netulo miilonga lyomathanekodhiladhilo ngoka pwaana ekateko.Okwa endulula nokudhimbulutha aaniilonga yomepangelo kutya oya tegelelwa ya tule miilonga omathaneko noshowo omilandu dha holomende pwaana omakateko gasha. Okwa indile aanambelewa yomoshikondo she ya etepo oompito dhiilonga moshilongo ashihe oku ziilila miitopolwa longa yawo moka yo ye na iinakugwanithwa..Poshigongi osho tuu shoka minista yopevi yiipindi noofabulika, Tjekero Tweya okwa indile aanambelewa opo ya tale iinima mbyoka ya pumbiwa oku ningwa nokulongwa muuministeli miitopolwa ayihe yoshilongo. Tweya okwiitaala kutya mokuninga ngaaka shika otashi kakala nenwethemo enene miilongomwa yomoshilongo ashihe. Okwa indile opo yo, ongo uuministeli yaa ninge oompata noshikondo shopaumwene ndele ya kale nokulongela kumwe okweetapo iipumbiwa ngele iikwamatungo moka oohandimwe moshilongo ta ya vulu okulongela okweetapo uuyamba. Okwa indile ishewe aaniilonga yuuministeli mboka ya kale ye na ontseyo kutya uuministeli wawo owulilepo shike, nokusoshimpwiyu kutya oonzo ndhoka dhi lipo odha longithwa nawa mokugandja omayakulo kaakalimo miilando noshowo momikunda dhoshilongo. Okwa endulula kutya uuministeli nawu ninge omathaneko nkene tawu vulu okulongitha oonzo ndhoka wu na po opo wu yakule aakalimo ayehe nawa.