Ewiliko lyaaHerero lya ti ka li holike kepangelo

EWILIKO lyopamuthigululwakalo lyAaherero kohi yomuwiliki, Kuaima Riruako olya lundile epangelo kutya olyo ta li hwameke omaipumomumwe pokati komihoko. Elundilo ndino olye ya konima sho aniwa omuwiliki gwa/Gobanin momudhingoloko gwOtjinene, Stefanus Gairseb a li a kambadhala okutopolela aantu evi momudhingoloko gwOtjinene iiwike iyali ya piti.

Gariseb okwa li a thiminikwa oku fadhukilapo koVenduka sho a li a tsakanekwa kaantu ye li lwopethele limwe nomilongo ntano yatya oondhimbo nomakatana mboka ya li ye mukeelele oku ka longa shoka a li a hala oku ka ninga.Ota ku hokololwa kutya aapopi yoshiHerero oya li ya geyithwa okuuva nenge okumona kutya mokati kaantu mboka ya li ye na okutulwa momahala gomomudhingoloko ngoka yamwe aniwa aapopi yOshiwambo, aapopi yoshiKavango, noshowo Aatswana. Okwaa uvathana esiku ndyoka okwa li okunene kokutya ngaaka, Gariseb okwa fadhukilepokoVenduka. Ngashingeyi okwa shuna kehala lye hoka oshoka okwa kwashilipalekwa kopolisi kutya ita ka ningwa sha. Ehala mpoka Gariseb aniwa a li ta ka tula aantu mboka olyo ehala lyuuliithilo wiimuna yaaHerero mboka natango haya munu iimuna mevi lyaayehe.Olutu oluwiliki pamuthigululwakalo gwAaherero olwa ti aawiliki yopamuthigululwakalo kayena uuthemba kombanda yoshitopolwa, ndele oyena uuthemba kombanda yaalelwa yawo.